Qazkommertsbank jalpyulttyq "Atamnyń jeńisi - meniń jeńisim!" áleýmettik aktsııasy ári qaraı jalǵasady
ALMATY. Mamyrdyń 25-i. QazAqparat /Erlik Erjanuly/ - Búgin Almatyda Qazkommertsbank jalpyulttyq "Atamnyń jeńisi - meniń jeńisim!" áleýmettik aktsııasyn 2011 jylǵy mamyrdyń 9-yna deıin jalǵastyratyny týraly baspasóz habarlamasyn taratty,
dep habarlaıdy QazAqparat.
"Jeńistiń 65 jyldyǵyna oraı uıymdastyrylǵan bul aktsııaǵa naýryzdyń 29-y men mamyrdyń 7-si aralyǵynda 55 adam qatysqan. Onda jeńimpaz batyrlardyń balalary men nemerelerinen 58 adamnyń tarıhyna qatysty qundy materıaldar jınaqtaldy. Bastapqyda bul aktsııany Jeńis kúni merekesinde aıaqtaý josparlanǵan bolatyn. Bizdi qoǵamdyq rezonans erekshe qaıran qaldyrdy. Sondyqtan ardagerlerge degen qurmettiń belgisi retinde ony aldaǵy Jeńis kúnine deıin jalǵastyrý týraly sheshim qabyldadyq", deıdi "Qazkommertsbank" AQ-nyń Basqarýshy dırektory Ermek Shamýratov.
Jalpy "Atamnyń jeńisi - meniń jeńisim!" aktsııasyna kez-kelgen adam qatysa alady. Olar bul úshin Jeńisti jaqyndatýǵa áskerı jáne eńbektegi eren erligimen óz úlesin qosqan týys-týǵandary men jaqyn-jýyqtarynyń áskerı tarıhyna qatysty eski sýretterine urpaq jalǵastyǵy retinde ózderiniń sýretterin qosyp sharany uıymdastyrýshylarǵa joldaýy kerek. Áleýmetik aktsııaǵa joldanǵan barlyq tarıh banktiń (kkb.kz) jáne alǵashqy áleýmettik banktik jelide (homeclub.kz ) ornalastyrylatyn bolady.
