Qazkommertsbank Ulttyq bankke qaryzyn 2017 tolyǵymen qaıtarmaq
«Sońǵy kúnderi jazyla bastaǵan BAQ betterindegi «Qazkommertsbanktiń» (Qazkom) qarjylyq ahýaly týraly aqparatqa baılanysty bank naqty málimdeme jasap otyr. Naqtyraq aıtqanda, ótken aptada «Bloomberg» agenttigi anonımdi derekkózine silteme jasaı otyryp, atalǵan banktiń «bankti saqtap qalý baǵdarlamalary» dep atalatyn arnaıy memlekettik baǵdalamasy boıynsha 1,5 trln teńge shuǵyl qaryz alǵanyn jáne «Qazkom» men Ulttyq bank basshylary arasynda osy máselede keńes bolǵanyn habarlady. Osyǵan baılanysty, bank Ulttyq bank jáne Úkimetpen arada kómek alý týraly eshqandaıda da kelissóz júrgizilmegenin resmı málimdeıdi», delingen habarlamada.
Qarjy ınstıtýty 14 jeltoqsan kúni ekinshi deńgeıli bankterge qysqa merzimde, álem boıynsha jasalatyn standartty protsedýralar aıasynda Ulttyq bankten 400,8 mlrd teńge kóleminde qaryz alǵanyn rastady.
Qaryz naryq sharttary boıynsha, tóleý jáne qaıtarý negizinde alynǵan.
«Bank jeltoqsan aıyndaǵy merekeler qarsańynda qysqa merzimdi lıkvıdıttiligin saqtaý maqsatynda Ulttyq banktiń barlyq bankter paıdalanatyn standartty «tereze» múmkindigin paıdalandy. Bank mundaı tájirıbeni alǵash jasap otyrǵan joq, sońǵy on jylda bank 10-12 ret osyndaı múmkindikti qoldanǵan», dep naqtylady banktegiler.
Resmı málimdemede alynǵan qaryzdyń arqasynda bank 2016 jyldyń qarjylyq merzimi aıaqtalý qarsańyndaǵy klıentterdiń jospardan tys shuǵyl tólemderin qamtamasyz ete alǵany aıtylǵan.
Sonymen qatar, bank búgingi kúnde qosymsha Qazaqstannyń 9 bankiniń klıentterine qyzmet kórsetip otyrǵan bólimsheler men bankomattar júıesindegi aýdarymdar men tólemder maýsymyna barynsha tyńǵylyqty daıyndalǵanyn jetkizdi.
«Jyl saıyn jeltoqsan aıyndaǵy jáne Jańa jyl merekesi kezinde qolma qol operatsııalar men tólemder aınalymy shuǵyl artady. 2014 jyly jeltoqsan aıynda qazaqstandyqtar Qazkom bankomattary arqyly 90 mlrd teńge alsa, 2015 jyly 140 mlrd teńge kóleminde qolma qol aqsha alǵan. Bıylǵy jyldyń jeltoqsanynda biz shamamen 200 mlrd teńge aınalymy bolady dep josparlap otyrmyz. Qazaqstandaǵy tólemderdiń úshten eki bóligi «Kazkomertsbank» tólem júıesi arqyly júretinin eskeretin bolsaq, Qazkom basshylyǵy klıentterimizdiń tólem jasaýlarynda qandaıda bir kedergi bolmaýyn qamtamasyz etýdi óz mindeti sanaıdy», - dep túsindirdi banktegiler.
Qazirgi ýaqytta bankte aldaǵy Jańa jyl merekesi qarsańynda kez kelgen tólemderdiń kedergisiz júrýi úshin banktiń úzilissiz jumysyn qamtamasyz etetin jetkilikti qory bar, dep naqtylady banktiń baspasóz qyzmetinen.
«Bank lıkvıdtilik deńgeıi men kapıtal jetkiliktiligi boıynsha prýdentsıaldy normatıvterdi tolyǵymen oryndap otyr. Alynǵan qarajattyń qysqamerzimdiliginiń dáleli retinde búgin bank Ulttyq bankke 200 mlrd teńge qaryzdy bólip tóledi. Qaryzdy tolyǵymen óteý merzimi 2017 jyldyń alǵashqy toqsanynda júzege asady dep josparlandy», dep atap ótti banktiń baspasóz qyzmeti.
Sonymen qatar, Qazkom klıentterin Ulttyq bank, QR Úkimeti, bank basshylyǵy men aktsıonerleri tarapynan ǵana jasalǵan resmı, naqtylanǵan aqparatqa senýge shaqyrady.
