Qazkommertsbank Problemalyq kredıtter qorymen 250 mlrd teńge jónindegi kelisimge qol qoıdy
ASTANA. QazAqparat - Almaty qalasynda 24 maýsym kúni «Kazkommertsbank» AQ (KKB) «Problemalyq kredıtter qory» AQ-men (PKQ) 10 jyldyq merzimge 250 mlrd teńge kóleminde sharttasylǵan qarjylandyrýdy bólý jónindegi kelisimge qol qoıdy, dep habarlady banktiń baspasóz qyzmetinen.
«QR Ulttyq Banki jáne úkimeti qabyldaǵan sheshimderge sáıkes, Ulttyq Banki PKQ-men Qazkommertsbanktiń nesıelik qorjynnyń sapasyn jaqsartý maqsatynda sharttasylǵan qarjylandyrý tásilin is-júzine asyrý boıynsha mámileniń sharttaryna kelisimin berdi. Atalǵan mámileniń nátıjesinde Kazkomda jáne jalpy bank salasynda jumys istemeıtin qaryzdardyń deńgeıi tómendeıdi dep kútilýde», - dedi Ulttyq Bank Tóraǵasynyń orynbasary Oleg Smolıakov. «BTA-men birigýdi aıaqtaǵan Kazkom úshin mańyzdy nátıjege qol jetkizildi. Memlekettiń qoldaýy biriktirilgen bankke balansty problemalyq kredıtterden tazalaýǵa kómektesedi. Bul biz úshin basym mindet bolyp tabylady», - dedi Qazkommertsbank basqarmasynyń tóraǵasy Maǵjan Áýezov. «Osy kelisimge qol qoıýdyń aldynda retteýshi organ, PKQ jáne Qazkommertsbank arasynda aýqymdy jumystar atqaryldy, barlyq qajetti protsedýralar men maquldaýlar sátti aıaqtaldy. Biz atalǵan mámile Qordyń negizgi mindetin is-júzine asyrýǵa sebeptesip, Qazaqstannyń bank júıesinde jumys istemeıtin qaryzdardyń úlesin azaıtýǵa jáne aktıvterdiń sapasyn arttyrýǵa eleýli úlesin qosady dep kútemiz», - dedi PKQ AQ basqarmasynyń tóraǵasy Ardak Tıes.
