KazJETP qurý memorandýmy Qazaqstannyń klımattyq mindettemelerin júzege asyrýda mańyzdy qadam bolady — Oshýrbaev
ASTANA. KAZINFORM — KazJETP qurý týraly memorandýmǵa qol qoıý Qazaqstannyń klımattyq mindettemelerin júzege asyrýda mańyzdy qadam bolady. Bul týraly Óńirlik ekologııalyq forýmnyń taqyryptyq sessııasynda Ekologııa jáne tabıǵı resýrstar vıtse-mınıstri Mansur Oshýrbaev aıtty.
— Búginde Qazaqstan jekelegen bastamalardan transformatsııalardyń júıeli baǵdarlamalaryna kóshýi talap etiletin kezeńde tur. Osy turǵydan alǵanda Qazaqstannyń ádil energetıkalyq kóshýi jónindegi eldik platformasy — KazJETP qurý týraly memorandýmǵa qol qoıý aıryqsha mańyzǵa ıe bola túsedi. KazJETP tek úılestirýshi alań ǵana emes, sonymen qatar aıqyndalatyn ulttyq kómirtek úlesi men kómirtek beıtaraptyǵyna qol jetkizý jónindegi jol kartasyn iske asyrýdyń naqty tetigi retinde qarastyrylady. Ekologııa mınıstrligi, Energetıka mınıstrligi jáne Eýropalyq qaıta qurý jáne damý banki kúsh-jigerin biriktirý energetıkalyq kóshý baǵytyndaǵy aýqymdy jobalardy júzege asyrý úshin berik ınstıtýtsıonaldy negiz qalyptastyrady dep senemiz. Atalǵan memorandýmǵa qol qoıý Qazaqstannyń klımattyq mindettemelerin is júzinde júzege asyrý jolyndaǵy mańyzdy qadamǵa aınalyp, yntymaqtastyǵymyzdy jańa deńgeıge kóteredi, — dedi vıtse-mınıstr.
Onyń atap ótýinshe, Qazaqstan úshin energetıkalyq kóshý kezeńi tek ekologııalyq basymdyq qana emes, sonymen qatar memlekettik saıasattyń strategııalyq baǵyty sanalady.
— Ol ekonomıkany jańǵyrtýmen, energetıkalyq qaýipsizdikti nyǵaıtýmen jáne turaqty ósimdi qamtamasyz etýmen tikeleı baılanysty. Qazaqstan Parıj kelisimi aıasyndaǵy halyqaralyq mindettemelerin júıeli túrde júzege asyryp keledi. Onyń ishinde 2035 jylǵa deıingi kezeńge arnalǵan jańartylǵan ulttyq deńgeıde aıqyndalatyn kómirtek úlesi de bar. Sonymen qatar 2060 jylǵa deıingi kómirtek beıtaraptyǵyna qol jetkizý strategııasy da júzege asyrylyp jatyr, — dedi vıtse-mınıstr.
Buǵan deıin halyqaralyq uıymdar Qazaqstannyń ekologııalyq bastamalaryn qoldaǵanyn jazǵan edik.
