Qazirgideı jaǵdaıda «G-global» jobasyna dınamızm men qoldanbaly sıpat kerek - N. Nazarbaev

ASTANA. QazAqparat - Qazirgi jaǵdaıda "G-global" jobasyna dınamızm men qoldanbaly sıpat kerek. Búgin Astanada ótip jatqan VII Astana ekonomıkalyq forýmy men Daǵdarysqa qarsy II dúnıejúzilik konferentsııanyń jalpy otyrysynda sóz sóılegen QR Prezıdenti Nursultan Nazarbaev osylaı málim etti.

«Álemdik tártiptiń jaqsaratynyna qatysty úmitterge qaramastan HHІ ǵasyrdyń basy qaýipterge toly, jańa qaterler týdyrǵan kezeń bolyp otyr. Osydan alty jyl buryn bastalǵan jahandyq daǵdarys eshqaıda joǵalyp ketken joq. Ol kerisinshe, jyl saıyn kúsheıip keledi. Adamzatty álemdik damýdyń túbegeıli jańa jobalary kútip tur. Men bul týraly 2009 jyldyń ózinde «Daǵdarys kilti jáne besinshi jol» atty maqalamda aıtqan bolatynmyn. Ýaqyttyń ózi bul daǵdarystyń saldarynan álemdik ósimniń barlyq eski úlgilerinen keıin múldem jańa álem týatynyn kórsetip otyr. Biz sol jańa álemniń besiginde turmyz. Al mundaı búgingi jaǵdaıda "G-global" jobasyna dınamızm men qoldanbaly sıpat kerek», - dedi Elbasy N. Nazarbaev.

Bul rette Memleket basshysy "G-global" biryńǵaı zııatkerlik bazasyn qurýdyń qajettigin, onda Astana ekonomıkalyq forýmy barysynda aıtylǵan ıdeıalar men usynystardyń jáne "G-global" portalyna kelip túsken pikirlerdiń barlyǵyn biriktirý kerektigin atap ótti. «Budan ári bundaı jınaqtalǵan biregeı ıdeıalardy taqyryptyq, toptyq, avtorlyq, jyldyq retpen jiktep, olardy buqaralyq aqparat quraldarynda, áleýmettik jelilerde, ǵylymı eńbekterde talqylaý men taratý nysanyna aınaldyrý qajet. Bizge BUU-ǵa, basqa da ekonomıkalyq, saıası forýmdarǵa joldaıtyn usynystarymyzdyń tizbegin qurǵan lázim», - dep túıindedi Qazaqstan Prezıdenti.