Qazirgi jýrnalıstıka memlekettik qoldaýdy qajet etip otyr - S.Mataev
ASTANA. 25 mamyr. QazAqparat /Aıdar Ospanalıev/ - «Búgingi jýrnalıstıka memlekettik qoldaýdy qajet etip otyr»,-deıdi Qazaqstan Jýrnalısteri odaǵynyń tóraǵasy Seıitqazy Mataev.
Bul týraly ol búgin Astanada ótip jatqan Bas redaktorlar klýby forýmy barysynda jýrnalıstermen bolǵan suhbatynda málim etti.
S.Mataevtyń sózine qaraǵanda, jýrnalısterdiń óz mártebeleriniń bolǵany durys. Óıtkeni búginde qoǵam arasynda jýrnalıstıka tórtinshi bılik degen uǵym qalyptasqan. «Alaıda biz tórtinshi bıliktiń rólin atqaryp otyrmyz dep aıta almaımyn. Biraq biz qoǵamǵa jumys istep jatyrmyz. Jýrnalıstıka salasynda problemalarǵa keletin bolsaq, olar óte kóp. Solardyń barlyǵyn sheshý kerek. Biz ol týraly quzyrly organdardy da habardar etip otyrmyz»,-dedi S.Mataev.
Onyń sózinshe, búgingi forým barysynda da biz memlekettiń aldyna qandaı menshik túri ekendigine qaramastan barlyq basylymdar úshin qosymsha qun salyǵynyń nóldik stavkasyn qoıý, gazetter men jornaldardy, telearnalardy memlekettik qoldaý sııaqty máselelerdi qoıyp otyrmyz. «Óıtkeni sońǵy ýaqytta jýrnalıstıka salasynda qalyptasqan problemalar memlekettik qoldaýdy qajet etedi. Bul jarnamanyń 70-80 paıyzǵa tómendep ketýimen baılanysty. Sondyqtan aqparat quraldarynyń jalǵyz ǵana kiris kózi memlekettiń qoldaýy bolyp otyr. Búgin biz osy máseleler tóńireginde qalyń kópshilikke usynys jasaımyz. Múmkin taǵy qandaı da bir usynystar da aıtylar. Aıtalyq, jańa shyqqan basylymdardyń aıaǵynan tik turyp ketýine múmkindikter jasaý qajet bolatyn shyǵar. Osylardyń barlyǵynda da memlekettik qoldaýdyń róli óte zor»,- deıdi Qazaqstan Jýrnalısteri odaǵynyń tóraǵasy.
