Qazirgi jastardyń zertteý jumysymen aınalysýǵa múmkinshilikteri mol - Gúljan Aıjolova

MATY. 30 qarasha. QazAqparat /Erlik Erjanuly/ - Jahandaný úrdisi barysynda ulttyq ekonomıkanyń damýynda birqatar máseleler týyndaýda. Indýstrıaldyq-ınnovatsııalyq is-áreket pen óndiris básekelestiginiń deńgeıin kóterýde jas ǵalymdardyń róli zor. Biz osyǵan oraı oı-pikirimen bólisý úshin Ál-Farabı atyndaǵy Qazaq ulttyq ýnıversıtetiniń Jas ǵalymdar keńesiniń múshesi, Geografııa jáne tabıǵatty paıdalaný fakýlteti stýdentteriniń ǵylymı-zertteý jumystarynyń jetekshisi Gúljan Aıjolovamen shaǵyn suhbat qurǵan edik.

- Gúljan Rollanqyzy, qazir jastardy ǵylymı-izdenis jumystarǵa tartý qoǵamdaǵy ózekti máselelerdiń biri bolyp otyr. Bul týraly óz oı-pikirińizben bólisseńiz?

Jas ǵalymdardy elimizdiń ǵylymı múkinshilikterin damytýǵa tartý úshin qazirgi tańda memleketimizdiń tarapynan úlken jumystar júrgizilýde. Máselen ózim jumys jasaıtyn ál-Farabı atyndaǵy Qazaq ulttyq ýnıversıtetinde Jas ǵalymdar Keńesi, Stýdenttik ǵylymı qoǵam men taǵy basqa da túrli ǵylymı ortalyqtar turaqty túrde óz qyzmetin atqaryp kele jatyr. Stýdentterdiń jáne jas ǵalymdar ǵylymı-zertteý jumystaryn yntalandyrý belsendi shyǵarmashylyq is-áreketke tartýdyń mańyzdy formasy bolyp tabylady. Joǵary kásibı mamandardy daıarlaýda onyń róli óte zor. Sondyqtan stýdentterge quqyqtary men mindetteri týraly keńes berip, ǵylymı úıirmeler men kafedralardaǵy ǵylymı-zertteý jumystarynyń ótkizilý mehanızmi jaıly aqparat beriledi. Al olardyń ǵylymı izdenis jumystary jyl saıyn arnaıy qurastyrylatyn jospar boıynsha júrgiziledi.

- Geografııa jáne tabıǵatty paıdalaný fakýltetindegi ǵalymdardyń ortasha jasy qansha? Onda stýdentter men jas ǵalymdardyń ǵylymı-zertteý jumysy qalaı júıelenedi?

Fakýltet boıynsha jalpy 115 oqytýshy bar, olardyń orta jasy -50. Onyń 50-i - jas ǵalymdar. Olardyń ishinde 15 geografııa ǵylymdarynyń kandıdattary, 1 PhD doktory jáne 4 PhD doktoranty bar. Stýdentterdiń ǵylymı-zertteý jumystaryn jáne Jas ǵalymdar keńesin baqylaý keńesteri atqaryp keledi. Keńestiń is-áreketteri SǴZJ jáne JǴK jarǵysy boıynsha retteledi. Jas ǵalymdar men stýdentter jyl saıyn ár túrli halyqaralyq konferentsııalar, semınarlar men dóńgelek ústel jıyndaryna qatysady. Atap aıtqanda «Geografııa», «Gıdrologııa», «Geodezııa jáne kartografııa» boıynsha Qazaqstannyń stýdenttik olımpıadasyna, «Jandanaev oqýlary» Halyqaralyq ǵylymı-tájirıbelik konferentsııasyna, QR Táýelsizdik kúniniń 20-jyldyǵyna arnalǵan «Ǵylym álemi» atty stýdentter men jas ǵalymdar halyqaralyq konferentsııasy qatysty. Sondaı-aq «Klımat jáne adamzat», Geodezııa jáne kartografııa damý jetistikteri jáne bolashaǵy», «Týrızmniń qazirgi damý perspektıvalary», «Qazaqstandyq týrızmniń el bedelin qalyptastyrýdaǵy mańyzy», «Ekonomıkalyq, áleýmettik jáne saıası geografııadaǵy ǵylymı zertteýler» dep atalatyn ǵylymı semınarlar ótkizildi.

- Stýdentterdiń jáne jas ǵalymdardyń ǵylymı-zertteý jumystaryn yntalandyrý týraly oıyńyzdy tarqata tússeńiz?

Jastardy ǵylymı-izdeniske belsendi tartý maqsatynda birinshi kýrsqa túskennen bastap ár stýdenttiń ǵylymı jumysy júıeli túrde uıymdastyrylýda. Mysaly, fakýltet qabyrǵasynda «Geografııa jáne tabıǵatty paıdalaný fakýltetiniń eń úzdik birinshi kýrs stýdenti» atty baıqaýy, «Meniń mamandyǵym» stend-gazetter baıqaýy, «Halyqaralyq týrızmdi damytýdaǵy Qazaqstan róli jáne múmkinshilikteri» atty stýdentterdiń ǵylymı esse baıqaýy ótti. Aı saıyn jas ǵalymdardyń zertteý taqyryptary boıynsha baıandamalary tyńdalyp, zertteý jumystarynyń barysy jan-jaqty taldanyp otyrady. Stýdentter men jas ǵalymdardyń ǵylymı izdenis jumystarynyń nátıjelerin qoldanysqa engizýge de jaǵdaılar jasalynyp jatyr. Ýnıversıtet jáne fakýltet qabyrǵasynda jyl saıyn stýdentter halyqaralyq kongresi ótkizilip keledi. Kongreste stýdentter men jas ǵalymdardyń ǵylymı izdenis jumystarynyń nátıjesi jurtshylyq nazaryna usynylady. Bul bolashaqta ár jas ǵalymnyń ǵylymı-zertteý jumysyn jetildirýine múmkindik beredi.

- Áńgimeńizge rahmet.