Qazirgi zamanǵy óner murajaıynda «Naýryz - jyl basy» atty merekelik is-shara ótti
ASTANA. Naýryzdyń 17-si. QazAqparat /Marlan Jıembaı/ - Búgin elordadaǵy Qazirgi zamanǵy óner murajaıynda «Naýryz - jyl basy» atty merekelik is-shara ótti. BUU Bas Assambleıasy «Halyqaralyq Naýryz meıramy» qararyn biraýyzdan qabyldap, naýryzdyń 21-in álemdik mereke retinde belgilegen meıramǵa oraı ótken keshte «Portret, peızaj jáne natıýrmort. 20 ǵasyrdaǵy keskindemelik tendentsııalar» taqyrybynda kórme uıymdastyrylyp,
«Til jáne mádenıet» qoǵamdyq birlestiginiń bastamasymen qazaq halqynyń salt-dástúrleri tanystyrylyp, án-jyrdan shashý shashyldy. Sonymen qatar elordadaǵy №2 Balalar mýzykalyq mektebiniń dombyrashylar men qobyzshylar ansambli merekelik kontsert qoıdy.
Kórermenge bereri mol kórme tórinde elimizdiń altyn qoryna engen óner týyndylary qoıylǵan. Atalǵan murajaı qorynan alynyp otyrǵan qundylyqtar qatarynda Qazaqstan, Reseı, Ýkraına, Moldova, Belarýs qylqalam sheberleriniń 1942-2009 jyldary aralyǵynda salynǵan 76 shyǵarmasy bar. Kelýshilerdiń qyzyǵýshylyǵyn oıatqan portret janryndaǵy Amandos Aqanaev, Abram Cherkaskıı, Alekseı Bortnıkov, Janataı Shárdenov, Aısha Ǵalymbaeva syndy sýretshilerdiń týyndylary qatarynan aqyn Oljas Súleımenov, jazýshy Muhtar Áýezov, halyq ártisi Serke Qojamqulov bastaǵan tanymal tulǵalardyń beınelerin kórýge bolady. Sondaı-aq kórmeni Qazaqstan men Reseı sýretshileriniń jeti músindik jumystary da tolyqtyra túsken.
Aıta keteıik, «Portret, peızaj jáne natıýrmort. 20 ǵasyrdaǵy keskindemelik aǵymdar» atty kórme naýryzdyń 25-inen bastap jumys isteıdi.
