«Qazirgi zaman qaharmany»: Aktsııa Hromtaýda jalǵasty
NUR-SULTAN. QazAqparat - «Qazirgi zaman qaharmany» respýblıkalyq aktsııasy Aqtóbe oblysynyń Hromtaý qalasynda jalǵasyn tapty, dep habarlaıdy QazAqparat tilshisi.
Aqtóbe oblystyq PD baspasóz qyzmetiniń málimetinshe, Hromtaýdaǵy saltanatty shara eń aldymen qyzmet babynda qaza tapqan polıtseılerge arnalǵan eskertkishke gúl shoqtaryn qoıyp, olardy eske alýdan bastaldy. Eskertkish qyzmetin atqarý kezinde 1980 jyly qylmyskerler qolynan qaza tapqan mılıtsııa maıory Bujyr Imanǵazın men buzaqylar qolynan mert bolǵan ýchaskelik polıtsııa qyzmetkeri Qymbatqazy Orazalınniń esimderin keleshek urpaq jadynda qaldyrýǵa arnalǵan bolatyn.
Sharaǵa Hromtaý aýdanynyń turǵyndary men jastar, ardagerler, aýdandyq polıtsııa bóliminiń jeke quramy, qaza tapqan polıtseılerdiń týystary qatysty.
Jınalǵan kópshilik aldynda sóz alǵan aýdan ákimi Naǵymjan Aldııarov aýdanǵa kelgen qonaqtarǵa alǵysyn bildirip, el turǵyndarynyń tynyshtyǵy men qaýipsizdigi jolynda anttaryna adaldyq tanytqan asyl azamattardyń beınesi otanshyldyqtyń jarqyn úlgisi bolyp qala beretinin aıtty. Sharada qaza bolǵandar bir mınýt únsizdikpen eske alyndy.
Sonymen qatar respýblıkalyq aktsııa qatysýshylary Hromtaý qalasyndaǵy №7 orta bilim beretin mektep ujymy jáne oqýshylarymen kezdesti. Bul kezdesýdiń jastar úshin úlken tárbıelik máni bar.
«Bizdiń maqsatymyz - elin súıetin, antyna adal, qyzmetin múltiksiz oryndaıtyn osyndaı áriptesterimizdiń umytylmas ónegeli ómir joldaryn jastarǵa úlgi etý. Sonyń naqty bir mysaly retinde Aqtóbe qalalyq polıtsııa basqarmasynyń jedel ýákili polıtsııa kapıtany Ánýar Abdýllınniń erlik áreketin aıtýǵa bolady. Ol seıftegi aqsha men altyn buıymdardy urlamaq bolǵan qarýlanǵan qylmyskerlerdi basyn qaterge tigip, ustaǵan bolatyn» - dedi saltanatty sharada sóz alǵan QR ІІM Kadr saıasaty departamenti bastyǵynyń orynbasary polıtsııa polkovnıgi Baqytjan Beıseev.
Hromtaýdaǵy kezdesý sońynda Almaty qalasy polıtsııa departamenti ansambliniń shyǵarmashylyq ujymy kontserttik baǵdarlamasyn usyndy.
Aktsııa Aqtóbe qalasynda da jalǵasyn taýyp, Q. Jubanov atyndaǵy Aqtóbe óńirlik memlekettik ýnıversıtetinde professor-oqytýshylar quramy jáne stýdenttermen kezdesýge ulasty.
Óskeleń urpaqtyń otanshyldyq rýhyn kóteretin bul mańyzdy patrıottyq shara qarashanyń 14-inde Aqtóbe oblysynyń Temir aýdanynda jalǵasyn tappaq.
15 qarasha kúni «Óner ortalyǵy» kontsert zalynda saltanatty is-sharanyń qorytyndy bólimi ótedi. Onda Іshki ister mınıstri atynan marapattaýlar men alǵys hattar tabys etiledi.
Aktsııa sońynda aqtóbelik turǵyndar nazaryna Almaty qalalyq polıtsııa departamenti ansambliniń kontserttik baǵdarlamasy usynylady.
