Qazirgi ýaqytta Túrkııa, Ózbekstan, Ázirbaıjan, Túrikmenstan sııaqty elderdiń álipbı aýystyrý tájirıbesi zerttelýde - QR Prezıdentimen «tikeleı jelidegi» suraqtarǵa jaýap
sp;ASTANA. Jeltoqsannyń 7-si. QazAqparat /Marlan Jıembaı/ - Qazaqstannyń latyn álipbıine kóshý máselesi birneshe jyldan beri kóterilip, talqylanyp kele jatyr. Osyǵan oraı qarashanyń 13-inde ótken QR Prezıdentimen «tikeleı jelide» aqtóbelik Aınash Álibekqyzy elimizdiń latyn álipbıine kóshý múmkinshiligi qanshalyqty degen saýal joldaǵan bolatyn.
Osy suraqqa QR Mádenıet jáne aqparat mınıstri Muhtar Qul-Muhammed «tikeleı jeli» saıty arqyly jaýap berdi.
«Qazirgi ýaqytta álipbıdi aýystyrýǵa baılanysty qoǵamda 4 túrli pikir bar, solardyń biri ózińiz aıtyp otyrǵandaı A.Baıtursynuly salǵan arab álipbıindegi tóte jazýdy jaqtaıtyndar. Degenmen de, qoǵamymyzda qazirgi qoldanystaǵy álipbıdi latynshaǵa aýystyrý tóńiregindegi máselede qyzý pikirtalas basym. Osy turǵyda latyn álipbıine kóshý jónindegi máseleni egjeı-tegjeıli qarap, usynys engizý jóninde Bilim jáne ǵylym mınıstrligine tapsyrma berilgen. Naqty sheshim qabyldaý úshin bul másele boıynsha jan-jaqty zerdeleý jumystary júrgizilip, barlyq jaıttar eskerilýi tıis. Bul rette asyǵystyq pen naýqanshyldyqqa barmaı, latyn álipbıine kóshken kórshi memleketterdiń úlgi, tájirıbelerin jan-jaqty sapaly zertteý arqyly sheshim qabyldaǵanymyz jón. Osyǵan baılanysty qazirgi ýaqytta Túrkııa, Ózbekstan, Ázirbaıjan, Túrikmenstan sııaqty elderdiń álipbı aýystyrý tájirıbesi zerttelýde», delingen mınıstrdiń jaýabynda.
