Qazirgi ýaqytta qylmystyń ınternatsıonaldy bolýyna oraı, onda ulttyq sıpat bolmaıdy - general-maıor E.Turǵumbaev
ALMATY. Naýryzdyń 31-i. QazAqparat /Ádilet Musahaev/ - Búgin Almatyda QazUÝ, Qylmyspen kúres máseleleri jónindegi ǵylymı-zertteý ortalyǵy jáne Qazaqstan Krımınologtar qaýymdastyǵynyń birlesip uıymdastyrýymen «Qazirgi kezdegi qylmystyq saıasat: ıntegratsııalyq úderister aıasyndaǵy onyń negizgi baǵyttary men basymdylyǵy» atty halyqaralyq ǵylymı-tájirıbelik konferentsııa ótip jatyr,
dep habarlaıdy QazAqparat.
Konferentsııa barysynda TMD memleketteriniń qylmystyq- quqyqtyq saıasatyn jetildirý men qylmystyq is júrgizý zańnamasyn bir júıege túsirý men úılestirý, terrorızm men ekstremızmge qarsy kúrestiń quqyqtyq negizderin jetildirý men olardy qarjylandyrý kózderin joıý jáne taǵy basqa máseleler talqylanyp, baıandamalar oqyldy.
Sondaı-aq salyq salý salasyndaǵy qylmysqa qarsy kúreste qoldanylatyn zańdardyń úılesimdiligi men ózektiligi, bank qyzmetindegi qylmystar men qylmystyq jolmen tabylǵan tabystardy zańdastyrý áreketine tosqaýyl qoıýdyń mańyzdy suraqtary da qaraldy.
Almaty qalasy ІІB-nyń bastyǵy, general-maıor Erlan Turǵumbaevtyń aıtýynsha, sybaılas jemqorlyq qylmysy men jurtshylyqtyń qaýipsizdigi halyqaralyq deńgeıdegi ózekti másele bolyp otyr. Onymen tıimdi kúresý úshin qylmysqa qarsy sharalardy birlese jasaý kerek. «Qazirgi ýaqytta qylmystyń ınternatsıonaldy bolýyna oraı, onda ulttyq sıpat bolmaıdy», deıdi E.Turǵumbaev.
Sharaǵa QR Prezıdenti Ákimshiliginiń, QR Bas prokýratýrasynyń, QR Joǵarǵy sotynyń, QR Іshki ister mınıstrliginiń, QR Ádilet mınıstrliginiń, QR Konstıtýtsııalyq Keńesiniń jaýapty ókilderi men Almaty qalalyq ІІB departamentiniń basshylyǵy qatysty.
