Qazirgi ýaqytta kompanııalarǵa valıýtalyq jáne paıyzdyq táýekelderdi hedjırleý qajet emes - dóńgelek ústel
ASTANA. Mamyrdyń 6-sy. QazAqparat /Jasulan Amanbaıuly/ - Búgin Astanada «Valıýtalyq jáne paıyzdyq táýekelderdi hedjırleýdiń tıimdi ádisteri men tásilderi» degen taqyrypta dóńgelek ústel otyrysy ótti,
dep habarlaıdy QazAqparat.
«Ortalyq Azııalyq keńesshiler» agenttiginiń uıymdastyrýymen bolǵan jıynǵa Ekonomıkalyq damý jáne saýda mınıstrligi, Qarjy mınıstrligi, QR Ulttyq banki, «QazMunaıGaz» ulttyq kompanııasy, «QDB Lızıng» AQ, «QTJ» kompanııasy, «Qaztemirtrans» AQ-nyń mamandary men sarapshylary qatysty.
Basqosýda «LIBOR» paıyzdyq stavkasy boıynsha alynǵan qarjylyq resýrstardy jáne valıýtalyq táýekelderdi hedjırleý, olardyń boljamdy kórsetkishteri talqyǵa salyndy.
«Ortalyq Azııalyq keńesshiler» agenttiginiń táýelsiz sarapshysy Nına Pýtııdiń aıtýynsha, qazirgi ýaqytta kompanııalarǵa «LIBOR» paıyzdyq stavkasyna baılanǵan mindettemelerdi hedjırleý tıimsiz ári jónsiz bolyp tabylady.
Onyń birneshe sebepteri bar. «Amerıkalyq valıýtanyń álemdik ekonomıkaǵa áseriniń álsireýinen kredıttik merzim aralyǵynda «LIBOR» paıyzdyq stavkasynyń ósimi bolmaıdy dep boljanýda jáne naryqtaǵy qazirgi stavka baǵamy sońǵy on jyl ishindegi stavkadan joǵary bolyp otyr», deıdi N. Pýtıı.
Al teńge-dollar valıýtaaralyq naryqta uzaq merzimdi kelisimderdiń joqtyǵy týyndaýy múmkin valıýtalyq táýekelderdi hedjırleý, saqtandyrý tásilderin qoldanýǵa mursha bermeıdi. Qazaqstandyq bankter teńge baǵamynyń sheteldik valıýtalarǵa salǵan aıyrmashylyqtaryna qatysty valıýtalyq táýekelderdi hedjırleýdi tek bir jyl kóleminde ǵana kelisim jasaý tetikterin usynady. Osy sebepten kompanııalarǵa valıýtalyq táýekelderdi hedjırleýdiń qajettiligi týyndap turǵan joq.
Hedjırleý - bul valıýta nemese paıyzdyq baǵamnyń ózgerýi barysynda týyndaıtyn shyǵyndardy boldyrmaı, táýekelderdi joıýǵa septigin tıgizetin qural. Táýekelderdi saqtandyrý arqyly kompanııalar senimdi túrde uzaq merzimge josparlar quraı alady. Degenmen, onyń keri jaǵy da joq emes. Máselen, baǵamnyń jaǵymdy ózgerýi barysynda kompanııalar odan joǵary paıda kórý múmkindiginen aırylmaq.
