Qazirgi ýaqytta halyq saılaýda daýys berýdiń mańyzyn túsinedi– Baqtııar Artaev
Sportshy QR Ulttyq mýzeıinde ornalasqan №309 saılaý ýchaskesinde daýys berdi. Atalǵan ýchaskede 2108 turǵyn saılaýshy retinde tirkelgen jáne túski 12-00-ge deıin 500-den astam daýys jınalǵan.
«Búgin men otandastaryma óte rızamyn. Tań atysymen kóptegen turǵyndar belsendi daýys berip jatyr. Qazirgi ýaqytta halyq daýys berýdiń mańyzdy ekenin, el bolashaǵy úshin paıdasy zor ekenin jaqsy túsinedi. Men de saılaýdan tys qalmaı, óz úlesimdi qosyp, partııalardyń baǵdarlamalarymen tanysa kele óz tańdaýymdy jasadym», - dedi Baqtııar Artaev tilshilerge bergen suhbatynda.
Sonymen birge, sportshy «Jańa depýtattardyń jumysynan ne kútesiz? Sport salasyndaǵy qandaı máseleler sheshilýi kerek?» degen suraqqa jaýap berdi.
«Jańa depýtattar úgit-nasıhat kezinde bergen ýádelerinde tursa eken deımin. Olar áleýmettik jaǵdaıy tómen otbasylarǵa kómektesemiz dedi, jaryq pen gaz tartamyz dedi, sondaı áleýmettik taqyryptar kóterildi. Sondyqtan, olarǵa tek qana sáttilik tileımin jáne bári sóz kúıinde qalmaı, iske assa degen tilegim bar. Jáne Prezıdent byltyr óńirlerde buqaralyq sportty damytýdy, kásibı sport klýbtarynyń demeýshiler esebinen jumys isteýin tapsyrǵan edi. Osy máseleler bıyl sheshiledi degen oıdamyn. Sosyn sport keshenderi qoljetimdi bola tússe, máselen elordanyń ózinde balalarǵa tegin sport nysandary joq. Osy máselelerdi qolǵa alyp, balalarǵa kerekti jaǵdaı jasalsa, kerekti sport nysandary salynsa, nur ústine nur bolar edi», - deıdi Baqtııar Artaev.
Eske sala ketsek, búgin Qazaqstan aýmaǵynda qurylǵan barlyq saılaý ýchaskesinde daýys berý júrip jatyr.
Depýtattardy saılaý boıynsha daýys berý Qazaqstan Respýblıkasy aýmaǵynda jáne odan tysqary jerde qurylǵan 10 060 saılaý ýchaskesinde júrgizilip otyr. Saılaý komıssııalary daýys berý orny men ýaqyty týraly der ýaqytynda aqparat berdi. Elorda ýaqytymen saǵat 08.00-de jaǵdaı boıynsha elimizdegi 9 994 saılaý ýchaskesinde jáne shet memleketterdegi qazaqstan ókildikteri janyndaǵy 17 saılaý ýchaskesinde daýys berý bastaldy.
Konstıtýtsııalyq merzimge saı ótip jatqan Májilis saılaýyna elimizde tirkelgen 5 saıası partııa, atap aıtqanda, «Aýyl» halyqtyq-demokratııalyq patrıottyq partııasy, «Nur Otan» partııasy, «ADAL» saıası partııasy, Qazaqstannyń «Aq jol» demokratııalyq partııasy, «Qazaqstannyń Halyq partııasy» depýtattyq mandattan úmitti.
Bul partııalar barlyq deńgeıdegi jergilikti máslıhattarǵa da óz kandıdattaryn usynǵan. Májiliske 5 partııadan barlyǵy 312 kandıdat, onyń ishinde: «Aýyl» halyqtyq-demokratııalyq patrıottyq partııasynan 19; «Nur Otan» partııasynan 126; «ADAL» saıası partııasynan 16; Qazaqstannyń «Aq jol» demokratııalyq partııasynan 38 jáne «Qazaqstannyń Halyq partııasynan» 113 adam bar. Al jergilikti máslıhattarǵa 832, onyń ishinde «Aýyl» HDPP-nan – 158, «Nur Otan» partııasynan - 216, «ADAL» SP-nan – 215, «Aq jol» QDP-nan – 174, «Qazaqstan Halyq partııasynan» 69 partııalyq tizim tirkeldi.
