Qazirgi ýaqytta et eksportyn arttyrýǵa múmkindik bar - Úkimet basshysy
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵantaev et eksporty kólemin ulǵaıtýǵa daıyndalýdy tapsyrdy, dep habarlaıdy QazAqparat.
«Elbasy óziniń tapsyrmasynda ekonomıkamyzdyń ósýiniń draıveri aýyl sharýashylyǵy bolýy kerektigin aıtty. Onyń ishinde etti mal sharýashylyǵynyń orny erekshe. Sol sebepten bul jumysqa bárimiz birdeı kúsh salyp kirisýimiz kerek. Degenmen de, kezinde 2010-2016 jyly syrtqa 60 myń tonna iri qara mal etin eksportqa shyǵaramyz dep mindetteme alǵan bolatynbyz. Biraq ol mindetteme túrli sebeptermen oryndalmady», - dep toqtaldy Úkimet basshysy.
Sonymen qatar ol Elbasynyń tikeleı aralasýymen Qytaıǵa jylqy eti men qoı etin kirgizýge barlyq kedergiler joıylǵanyn, BAÁ tarapynan iri qara men usaq mal etin kirgizý kedergileri alynyp tastalǵanan atap ótti. Qytaımen arada osy iri qara mal boıynsha jumystar jyldyń sońyna deıin aıaqtalatyn bolady.
«Qazirgi ýaqytta maldyń sanyn kóbeıtip, eksportqa shyǵarýǵa múmkindik bar. Naryq ashylyp jatyr. Sol sebepten Sizderdiń búgingi baıandamalaryńyzda kórsetilgen josparly is-sharalardy quzyretti organdarmen kelisip pysyqtap alý kerek», - dep tapsyrdy B. Saǵyntaev.
Sóz sońynda Premer-Mınıstr Aýyl sharýashylyǵy mınıstrligine jem-shóp máselesine aıryqsha nazar aýdarýdy tapsyrdy.
Aıta keteıik, búgin Úkimet otyrysynda «2018-2027 jaldarǵa arnalǵan etti mal sharýashylyǵyn damytý» baǵdarlamasy tujyrymdamasynyń jobasy tanystyryldy.
«Aýyldyq jerlerde jalpy el turǵyndarynyń 50 paıyzy ómir súredi jáne tirshilik etedi. Bul degenimiz, aýyl turǵyndarynyń basym kópshiligi osy baǵdarlama aıasynda jumyspen qamtylady. Baǵdarlamany júzege asyrý jańa mal ósirýshi-fermerler klasyn qurýǵa múmkindik beredi. Baǵdarlama aıasynda fermerlik sharýashylyqtardyń sanyn 20 myńnan 100 myńǵa deıin ósýin, aýyl turǵyndaryna jumys oryndaryn 100 myńnan 500 myńǵa deıin ulǵaıtýǵa múmkindik bolady», - dedi Aýyl sharýashylyǵy birinshi vıtse-mınıstri Arman Evnıev.
Sonymen qatar iri qara mal sanyn 7 mıllıonnan 15 mıllıon basqa deıin kóbeıtýge, sıyr jáne qoı eti óndirisin 600 myń tonnadan 1,6 mln tonnaǵa deıin arttyrýǵa, eksporttan túsetin paıda kólemin 2,4 mlrd AQSh dollaryna deıin ulǵaıtýǵa, 1 jumysshyǵa eńbek ónimdiligin 1000 AQSh dollarynan 8000 AQSh dollaryna deıin ósirýge negiz bolady.
