Qazirgi ýaqytta elektrondy memlekettik satyp alýlar portalynda 70 myńnan astam qatysýshylar tirkeldi
A. Qyrkúıektiń 21-i. QazAqparat /Ernur Aqanbaı/ -Qazirgi ýaqytta elektrondy memlekettik satyp alýlar portalynda 70 myńnan astam qatysýshylar, sonyń ishinde 46 myń jetkizýshi tirkeldi. Bul týraly búgin Úkimettiń Baılanys jáne aqparat mınıstrliginde ótken kóshpeli májilisinde Qarjy mınıstri Bolat Jámishev aıtty.
Onyń sózine qaraǵanda, atalmysh portalǵa aptasyna 300 myń adam kiredi, kúnine tipti 30 myń adam kiretin kezder de bolady. Memlekettik tapsyrys berýshiler atalmysh veb-portalda elektrondy formatta 18 myń memlekettik satyp alýlardyń jyldyq josparyn jarııalaǵan jáne memlekettik satyp alýlardyń nátıjeleri týraly 900 myńnan astam sheshimder ornalastyrylǵan. «Aǵymdaǵy jyly elektrondy memleketik satyp alýlar mindetti tártipte baǵa usynysy tásili boıynsha, al konkýrs tásilimen satyp alýlar ilki rejimde iske asyrylýda. Jalpy somasy 1 mlrd. 400 mln. teńge bolatyn 90-ǵa jýyq konkýrstar ótkizildi. «Memlekettik satyp alýlar týraly» zańǵa ózgerister engizý týraly joba daıyndaldy. Bul normany kelesi jyldan bastap barlyq memlekettik organdar qoldanatyn bolady», dedi mınıstr.
