Qazirgi ýaqytta Azııalyq qaýipsizdikti baǵdarlamaı Eýropalyq qaýipsizdikti qamtamasyz etý múmkin emes - B.Sultanov
/strong>Sáýirdiń 27-i. QazAqparat / Ádilet Musahaev / - 20-shy ǵasyrda halyqaralyq qaýipsizdik pen turaqtylyq qyzmetin atqarǵan polıarlyq júıeniń quldyraýyna oraı, aımaqtyq qaýipsizdiktiń jańa júıesin damytyp, qurý qajet etýde.
Bul jaıynda QR Prezıdenti janyndaǵy Qazaqstandyq strategııalyq zertteýler ınstıtýtynyń dırektory Bolat Sultanov «Soltústik-Shyǵys Azııadaǵy qaýipsizdik pen yntymaqtastyq jáne EQYU qaýipsizdik pen taratpaý salasyndaǵy kópjaqty yntymaqtastyq» taqyrybynda ótken dóńgelek ústel barysynda aıtty, dep habarlaıdy QazAqparat.
Onyń aıtýynsha, Qazaqstan qıyn-qystaý kezeńde EQYU-ǵa tóraǵalyq etýde.
«Terrorızm, ekstremızm, tabıǵı apattar, kedeıshilik jáne taǵy basqalary qazirgi ýaqytta oryn alýda. Munyń bári jahandyq ekonomıkalyq daǵdarystyń áserinen bolyp jatqan dúnıeler. Onyń arty Reseıdegi metroda oryn alǵan jarylys pen Qyrǵyzstandaǵy tóńkeriske deıingi áreketterge ákep otyr. Osy tusta bizdiń el EQYU-ǵa óziniń jańa baǵdarlamasyn usynýda. QR Prezıdenti N.Á. Nazarbaevtyń pikirinshe, Eýrazııalyq aımaqtyq qurylymdarmen jumyla otyryp EQYU-ǵa jańa dem berý qajet. Qazirgi ýaqytta Azııalyq qaýipsizdikti baǵdarlamaı Eýropalyq qaýipsizdikti qamtamasyz etý múmkin emes. Sondyqtan búgin biz Soltústik-Shyǵys Azııadaǵy qaýipsizdik máselelerin qarastyrmaqshymyz», deıdi B.Sultanov.
EQYU-nyń Bas hatshysynyń keńse dırektory Pol Frıch Qazaqstannyń EQYU-ǵa tóraǵalyq etý kezeńinde kórshi Qyrǵyzstanda úlken másele týyndaǵanyn jáne EQYU men Qazaqstan osy eldegi áreketti jedel rettep, turaqtylyqty saqtap qalý baǵytyn ustanyp otyrǵanyn aıtady. «Qazaqstan jaqyn kórshi el retinde Qyrǵyzstanda oryn alǵan keleńsizdikti sheshýge kómektesti. Sonymen qatar keleshektegi Qyrǵyzstannyń konstıtýtsııalyq qurylymynynyń qalyptasýyna da demeý bere alady», deıdi P.Frıch.
