Qazirgi ýaqytta Astanada turǵyn úı alý kezegindegi azamattardyń sany 21 myńnan asady - I. Tasmaǵambetov
ASTANA. 4 jeltoqsan. QazAqparat /Jasulan Amanbaıuly/ - Qazirgi ýaqytta Astanada turǵyn úı alý kezegindegi azamattardyń sany 21 330. Bul týraly óziniń jeke blogynda turǵyndardyń saýalyna jaýap bergen elorda ákimi Imanǵalı Tasmaǵambetov aıtty.
Astanada páter jaldap turyp jatqan Sheker Raıymqulova tolyq emes otbasy retinde baspana alýǵa qatysty ótinishpen saýal qoıǵan bolatyn.
«Uzaq ýaqyt qujattarymdy daıyndap, 2010 jyldyń tamyz aıynda ǵana tolyq emes otbasy retinde, memlekettik qordan bólinetin baspana kezegine turdym. Turǵyn úı qurylys jınaq bankisine esepshot ashyp, aqsha jınaýǵa eshqandaı múmkindigim joq. Qyzym aqyly bólimniń stýdenti. Eki bankte kredıtim bar jáne árkimnen bólme jaldap turyp júrgenimizge de on bes jyldyń kólemi bolyp qaldy. (Kezegim kelmeıinshe, maǵan da baspana berilmeıtinin bilemin). Biraq, Sizden Astana qalasynyń basshysy retinde, Táýelsizdigimizdiń jıyrma jyldyǵyna oraı, jańa jyldy óz baspanamda qarsy alýyma kómektesseńiz eken deımin!», - delingen Sh. Raıymqulovanyń hatynda.
Ákimniń aıtýynsha, qazirgi ýaqytta turǵyn úı alý kezegindegi azamattardyń sany 21 330 bolyp tirkelgen. Memlekettik turǵyn úı qorynan baspanaǵa muqtajdar esebinde Sh. Raıymqulova «tolyq emes otbasy» sanaty boıynsha 2010 jyldyń 18 tamyzynan bastap № 7799 bolyp kezekte turǵan kórinedi.
«Turǵyn úılerdiń paıdalanýǵa berilýine qaraı jyldan jylǵa kezekte turǵan azamattar baspanamen múmkindiginshe qamtamasyz etilip keledi. Ári ol Qazaqstan Respýblıkasynyń «Turǵyn úı qatynastary týraly» Zańyna sáıkes, muqtaj jandar esebinde turǵan azamattarǵa ótinish bergen sátinen bastap bekitilgen tizim boıynsha kezek tártibimen beriletinin eske salǵym keledi. Kezekten tys eshkimge páter berilmeıdi», - dep jaýap berdi I. Tasmaǵambetov.
