Qazirgi tańda jastarǵa degen senim aıryqsha artty - «Zańǵar» shyǵarmashylyq birlestiginiń tóraǵasy Aıdar Qyryqbaı
ALMATY. Tamyzdyń 10-y. QazAqparat /Názıra Eleýhan/- Respýblıkalyq «Qalamger - Azamat» jas tilshiler forýmynyń aıasy jyldan-jylǵa keńeıip keledi jáne bizdiń bastamamyz Úkimet tarapynan qoldaýǵa ıe bolyp otyr.
Alǵashqy forýmǵa "Ulan" jáne "Aq jelken" basylymdarynyń jas tilshileri men mektep oqýshylary qatyssa, bıyl elimizdiń barlyq oblys, aýdandarynyń jas tilshileri qatysady. Bul týraly búgin Almatyda ІІІ Respýblıkalyq «Qalamger - Azamat» jas tilshiler forýmynyń ótýine oraı bolǵan baspasóz máslıhatynda «Zańǵar» shyǵarmashylyq birlestiginiń tóraǵasy Aıdar Qyryqbaı aıtty, dep habarlaıdy QazAqparat.
Onyń aıtýynsha, qazirgi tańda jastarǵa degen senim aıryqsha artqan. "Oǵan forýmnyń uıymdastyrý komıtetine, el basqaryp otyrǵan azamattardan, ákimder men zııaly qaýymnan kelgen 20-dan asa quttyqtaý-tilek hattar men Úkimet basshysy Kárim Másimovtyń forým qatysýshylaryna jibergen quttyqtaý haty dálel bola alady. Premer -Mınıstrdiń quttyqtaý hatynda: "Ultymyzdyń bolashaǵy da, mádenıeti men ádebıetiniń keleshegi de Sizderdiń qarym-qabiletterińizde. Táýelsiz elimizdiń tálimdi urpaǵyn qalyptastyrýda ózderińizdeı jas órenderdiń orny bólek, júkteler jaýapkershilik te joǵary" dep kórsetilgendeı, biz jastar, elimizdiń úkilegen úmitin aqtaýymyz kerek", dep atap ótti ol baspasóz máslıhatynda.
