Qazirgi tańda latyn álipbıi úlken bedelge ıe - Professor
TALDYQORǴAN.QazAqparat - Qazirgi tańda latyn álipbıi úlken bedelge ıe. Qoldanys aıasy da múmkindigi de zor ekendigin tanytyp otyr. Mundaı tujyrymdy oıyn Іlııas Jansúgirov atyndaǵy Jetisý memlekettik ýnıversıtetiniń oqytýshysy, fılologııa ǵylymdarynyń doktory, professor Muratbek Imanǵazınov bildirdi, dep habarlaıdy QazAqparat tilshisi.
Muratbek Imanǵazınovtyń aıtýynsha, álem boıynsha barlyq salada latyn álipbıiniń qoldanysy keń.
«Atap aıtqanda, dári-dármek ataýlary, matematıka, fızıka, hımııa formýlalary, bárimizdiń elektrondyq poshtamyz kırıl, arab, nemese basqa emes latynmen jazylǵan, kóligimizdiń nómirindegi áripter, kýáligimiz ben pasportymyz da latynmen berilgen. Qazirgi ýaqytta ǵalamtor men uıaly baılanystyń jazbalaryn paıdalanýshylar, ásirese, búgingi jas býyn ókilderi latyn álipbıin áldeqashan paıdalanyp ta júr. Osyndaı mysaldardy kóptep keltire berýge bolady. Latyn álipbıine kóshý kóptegen problemalardy sheship qana qoımaı, qazaq tiliniń halyqaralyq dárejege shyǵýyna jol ashady. Elbasynyń «Bolashaqqa baǵdar: rýhanı jańǵyrý» atty maqalasyndaǵy elimizdiń rýhanı jańǵyrýy jónindegi kózqarastarynan, sonyń ishinde qazaq tiliniń latyn álipbıine kóshetini týraly qorytyndy pikirinen kókeıimizde júrgen suraqtarymyzǵa jaýap alǵandaımyz. Urpaq keleshegin oılasaq, ulttyǵymyzdyń negizgi belgisiniń biri - tilimizdi saqtap qalamyz desek, álemniń ozyq elderi ıgiligin kórip, kópshiligi qoldap otyrǵan latyn álipbıine bizdiń de kóshkenimiz kezek kúttirmeıtin másele ekendigi aıqyn»,- deıdi professor.
Sondyqtan Muratbek Imanǵazınov, elimizdiń jarqyn bolashaǵyna baǵyttalǵan Elbasynyń «Bolashaqqa baǵdar: rýhanı jańǵyrý» atty maqalasyndaǵy usynystar, aıtylǵan oılar ómirimizge jańasha serpin beretin batyl qadam dep baǵalaıdy.
