Qazirgi tańda ishki naryqtan tarshylyq kórip otyrǵan kásiporyndar bar-joǵyn eshkim aıta almaıdy - Qazaqstannyń táýelsiz kásipkerler qaýymdastyǵynyń prezıdenti
ALMATY. Qańtardyń 18-i. QazAqparat /Erlik Erjanuly/ - Qazaqstannyń Kedendik odaqqa múshe bolýy kásipkerler úshin paıdaly ma, álde zııan ba?
Bul búgin Almatyda Qazaqstannyń táýelsiz kásipkerler qaýymdastyǵy uıymdastyrǵan dóńgelek ústel májilisinde talqylanyp jatyr, dep habarlaıdy QazAqparat.
Qalalyq kedendik baqylaý departamentiniń Kedendik kirister basqarmasynyń bastyǵy Áıgerim Álıasqarovanyń aıtýynsha, shildeniń 1-inen Keden kodeksi qoldanysqa enedi. Osyǵan sáıkes, Qazaqstanǵa ákelingen Belarýs pen Reseıde shyǵarylǵan taýarlar deklaratsııalanbaıdy. Qazirgi tańda taýarlardyń biryńǵaı kedendik mólsherlemesi quzyrly organdardyń ınternettegi saıttaryna ilingen. Buǵan deıin ol jeltoqsannyń 26-synda memlekettik respýblıkalyq resmı basylymdarda jarııalanǵan bolatyn.
Basqosý kezinde kásipkerlerdiń: qazirgi tańda ishki naryq tapshy bolyp otyrǵan sala, ne kásiporyn bar ma degen saýalyn kedendik baqylaý departamentiniń ókilderi jaýapsyz qaldyrdy. Qazaqstanyń táýelsiz kásipkerler qaýymdastyǵynyń prezıdenti Talǵat Akýovtyń paıymdaýynsha, bul saýalǵa qazir eshkim jaýap bere almaıdy. Bul búgingi tańdaǵy eń kúrdeli másele.
