Qazirgi tańda elimizde múgedekterge arnalǵan 4 sport klýby, 2 sport mektebi bar - E. Qanaǵatov
ALMATY. Jeltoqsannyń 23-i. QazAqparat / Ádilet Musahaev / - Búgin Almatyda QR Ulttyq Paralımpııalyq komıteti men Týrızm jáne sport mınıstrligi birlesip semınar-májilis ótkizdi,
dep habarlaıdy QazAqparat.
Jıyn barysynda 2009 jylǵy múgedekter sportyn damytýda atqarylǵan ister qortyndylanyp, aımaqtyq jáne respýblıka kóleminde múgedekter sportyn 2010-2012 jyldardaǵy damýynyń jospary, baǵyt-baǵdary aıqyndaldy.
QR Ulttyq Paralımpııalyq komıtetiniń prezıdenti Elsııar Qanaǵatovtyń aıtýynsha, densaýlyǵy shekteýli sportshylardyń 2009 jyly halyqaralyq jarystarda kórsetken jetistikteri jaman emes. «Otyryp oınaıtyn voleıboldan álem chempıonatynda ІІІ oryn alyp, qola medalǵa ıe boldy. Jastar arasyndaǵy Azııa oıyndarynda bizdiń sportshylar 23 medalǵa qol jetkizdi», deıdi E. Qanaǵatov. Sonymen qatar, ol densaýlyǵy shekteýli jandardyń sportyna kóp kóńil bólý kerektigin, qınalyp júrgen azamattardy sportqa tartyp, ómirin qaıta jandandyrýǵa bolatyndyǵyn aıtty. «Árbir oblystyq, jergilikti atqarýshy organdarǵa osy sportqa kóńil bólip, osyndaı jandarǵa sportpen aınalysýyna jaǵdaı jasalsa jaqsy bolar edi. Bizdiń tarapymyzdan kómekter kórsetilip jatyr, degenimen jergilikti jerlerde osy másele kóterilýi kerek. Óıtkeni qazirgi tańda elimizde múgedekterge arnalǵan 4 sport klýby, 2 sport mektebi ǵana bar. Sondyqtan árbir aımaqta osyndaı klýbtar men mektepter bolýy qajet», deıdi Elsııar Qanaǵatov.
