Qazirgi tańda elimizde 2300 meshit bar
ASTANA. 10 tamyz. QazAqparat - Qazaqstandaǵy barlyq meshitterdi bir ortalyqqa qaratý, olardyń qyzmetterin qadaǵalap, basyn qosyp otyrý - elimizde Islam dininiń el arasynda durys nasıhattalýynyń úlken kepili.
Sonymen qatar Islam dini kóptegen ulttar men ulystar mekendegen respýblıkamyzda tatýlyq pen dostyqtyń, ózara kelisim men birliktiń nyǵaıýyna óz úlesin qosatyny daýsyz. Osyny eskere otyryp Qazaqstan musylmandary dinı basqarmasy barlyq oblystar men óńirlerdegi meshitterdi 2000 jyldan bastap óziniń fılıaly etip tirkeýden ótkizý is-sharalaryn bastaǵan bolatyn. Búgingi tańda elimiz boıynsha olardyń sany 2300 meshitti qurasa, bulardyń basym kópshiligi fılıal bolyp tirkeýden ótken. Qarajat tapshylyǵy qıyndyq týdyryp áli tirkele almaı otyrǵan meshitterimiz de kezdesedi.
«Osman ıbn Affannan (r.a.) rıýaıat etken hadıs sharıfte Paıǵambarymyzdyń (s.ǵ.s) «Kim Allanyń dıdaryn qalap, onyń jerdegi úıin turǵyzsa, Alla taǵala oǵan jánnatta sondaı úı turǵyzady» - degenin estidim», - degen eken. Allaǵa táýbe elimizdiń barlyq oblystary men óńirlerinde Allanyń úıleriniń sany kún sanap ósýde. Bulardyń birqatary jeke azamattardyń qarjysyna turǵyzylsa, sonymen birge qaıyrymdylyq qorlardyń demeýshiligimen turǵyzylyp jatqan meshitter de bar. Buǵan qosa Qazaqstan musylmandary dinı basqarmasynyń meshit isteri bólimine elimizdiń túkpir-túkpirinen óz aýyldarynda meshit turǵyzyp berýin ótinip jazǵan hattar da kóptep keledi. Degenmen, Dinı basqarmanyń buǵan qarjylaı múmkinshiligi shekteýli. Biraq osy mazmunda kelip jatqan hattardy arnaıy tizimge alyp, meshit turǵyzýǵa nıet bildirgen qaıyrymdylyq qorlarǵa hat týraly tolyq málimet berip dánekerlik etedi. Qazaqstandaǵy barlyq meshitter QMDB-nyń menshigi bolyp sanalady.
