Qazirgi tańda «dáriger - naýqas» modelinen birtindep «dáriger - saý adam» modeline kóshý máselesi ózekti bolyp tur - professor A. Qarakúshikova
ALMATY. 10 aqpan. QazAqparat /Erlik Erjanuly/ - Dárigerge aýyryp, saýlyǵyna nuqsan keltirgen adam emes, densaýlyǵyn profılaktıkalyq maqsatta teksertýge kelgen saý adam qaralýy kerek.
Bul týraly Sanjar Asfendııarov atyndaǵy Qazaq ulttyq medıtsına ýnıversıtetiniń Ǵylymı jumystar jáne ınnovatsııalyq jobalar jónindegi prorektory, B.Atshabarov atyndaǵy irgeli jáne qoldanbaly medıtsına ǵylymı-zertteý ınstıtýtynyń dırektory, medıtsına ǵylymdarynyń doktory Aıgúl Qarakúshikova QazAqparat tilishisine bergen suhbatynda aıtty.
Salaýatty ómir salty - turǵyndardyń ómir surý jasyn uzartýǵa ǵana emes, árbir adamnyń óz densaýlyǵyna degen jaýapkershiligin arttyrýǵa kómektesetin birden-bir faktor. Qazirgi tańda «dáriger - naýqas» modelinen birtindep «dáriger - saý adam» modeline kóshý máselesi ózekti bolyp tur. Buǵan jalpy halyqtyń sana-sezimin birtindep osyǵan aýdarý úshin biraz ter tógý qajet. Degenmen de, Memleket basshysynyń bıylǵy Joldaýynda halyqtyń densaýlyǵyna qatysty kóterip otyrǵan máseleleri búgingi zaman talaptarynan týyp otyr.
« Ǵylymı-zertteý máseleleri búgingi ınnovatsııalyq jańalyqtarsyz esh alǵa jyljymaıtyny daý týdyrmaıdy. Tipti, ǵylym ǵana emes, qarapaıym dárigerdiń ózi qazirgi tańda básekege qabiletti bolý úshin nebir medıtsınalyq apparattarmen jumys isteı bilýi kerek. Sondyqtan Elbasynyń Joldaýyndaǵy ınnovatsııaǵa qatysty qoıǵan mindetteri qoǵamdy taǵy bir jańa satyǵa kóteretini sózsiz», - deıdi A. Qarakúshikova. Medıtsına qyzmetkerlerin daıarlaý isinde jumys jasap júrgenine 30 jylǵa jýyqtap qalǵan bilikti mamannyń paıymdaýynsha, eń aldymen jastar máselesine, sonyń ishinde bilim berý jáne jastardy ǵylymǵa tartý isine basa nazar aýdarý kerek. Búgingi zaman talaby qatań. Soǵan sáıkes bizdiń elimizdegi bilim berý isi de sheteldiń ozyq úlgilerin nazarǵa alyp, bilim berý júıesin ońtaılandyrýǵa bet burýda. Ǵylymǵa jańa kózqaras qalyptasa bastady. Bul máseleni Elbasy ótken jylǵy Joldaýynda da erekshe atalyp ótken bolatyn. Bıyl da bilim men ǵylym salasy eldiń erteńin aıqyndar, bolashaqqa nyq qadam basýǵa múmkindik beretin mańyzdy salalardyń kósh basynda turǵany qýantady.
