Qazirgi tańda Aýyl sharýashylyǵy mınıstrligi júıesinde 305 bos jumys orny bar

ASTANA. QazAqparat - Qazirgi tańda Aýyl sharýashylyǵy mınıstrligi júıesi boıynsha elimizde 305 bos jumys orny bar. Bul týraly búgin Aýyl sharýashylyǵy mınıstrliginde agrarlyq mamandyqtardy daıyndaıtyn 7 JOO túlekterin jumysqa tartý aıasynda ótken «Jas mamanǵa - aq jol!» aktsııasy barysynda málim boldy.

Shara kezinde 462 stýdent úshin mınıstrlik boıynsha qysqasha ekskýrs ótkizildi. Vedomstvo qyzmetkerleri ortalyq apparattyń qurylymy jaıynda, mansap ósiminiń múmkinshiligi men perspektıvasy jaıly jáne qyzyqtyratyn saýaldarǵa jaýap berdi.

Baspasóz qyzmetiniń málimeti boıynsha, 2013 jyly joǵary qyzmetterge 153 adam taǵaıyndaldy, onyń 125 adamy (82%) mınıstrlik qyzmetkerleri. Biliktilikti joǵarlatý kýrstarynan - 1977 qyzmetker ótti. Mınıstrliktiń 4 qyzmetkeri búginde Eýrazııalyq ekonomıkalyq komıssııanyń Kedendik odaq jáne Eýrazııa ekonomıkalyq keńistik uıymynda qyzmet etýde. «Bolashaq» baǵdarlamasynda 3 qyzmetker oqýda.

«Búgingi tańda Mınıstrlik shtatynda 4 139 adam qyzmet etedi, atap aıtqanda: Astanadaǵy ortalyq apparatta - 231, oblystyń jáne aýdandyq ınspektsııalardy qosqanda AÓK memlekettik ınspektsııalary komıtetinde - 1 472, Veterınarııalyq baqylaý jáne qadaǵalaý komıtetinde - 2 436. Qazirgi tańda júıe boıynsha 305 bos oryn bar» - delingen AShM baspasóz qyzmeti taratqan habarlamada.