Qazirgi kúnde Qazaqstanda úleskerlerdiń múddeleri 100 paıyz qorǵalǵan
ASTANA. Qyrkúıektiń 3-i. QazAqparat /Ernur Aqanbaı/ - Qazirgi kúnde Qazaqstanda úleskerlerdiń múddeleri 100 paıyz qorǵalǵan. Bizdiń elimizde úleskerlik qurylystyń keleshegi bar. Bul týraly búgin Bnews portalynda ótken onlaın-konferentsııada Qurylys isteri jáne turǵyn úı -kommýnaldyq sharýashylyq agenttigi Turǵyn úı saıasaty departamentiniń dırektory Kenjebolat Myńbaev aıtty.
Onyń aıtýynsha, tıisti zańnamaǵa engizilgen ózgertýlerge sáıkes, aıaqtalmaı qalǵan turǵyn úılerdiń qurylysyna memleket tarapynan bólingen, úleskerler salǵan qarajat birde-bir qurylys salýshy kompanııaǵa túspeıdi, endi depozıtte jatatyn bolady. «Bul jerde úleskerdiń quqyǵy tolyǵymen qorǵalǵan. Tipti qurylys salýshy kompanııa quryp ketken kúnniń ózinde, úlesker utylmaıtyn bolady, onyń aqshasy saqtalady. Úlesker salǵan qarjysyn qaıtaryp alady, oǵan qosymsha protsentter alady», dedi K. Myńbaev.
Osy oraıda, K. Myńbaev jańa zańnamaǵa sáıkes, qurylys salýshy kompanııaǵa qoıylatyn talaptar da qatańdatylǵanyn atap kórsetti. «Qurylys salýshy kompanııa nóldik tsıkldy ózi salýy tıis, qurylysty odan ári jalǵastyrýǵa onda belgili bir kólemde qarjy bolýy qajet. Lıtsenzııalaýdyń eki kezeńi engizilgen», dedi ol. Osy oraıda, K. Myńbaev Qazaqstanda úleskerlik qurylystyń keleshegi bar ekendigin atap kórsetti. «Meniń oıymsha, keleshekte úleskerlik qurylys damıtyn bolady. Árıne, daǵdarystyń saldarynan qurylystyń kólemi tómendep ketti. Eger birtindep ekonomıkamyz qalpyna keletin bolsa, suranys usynysty týǵyzady», dedi ol. Onyń aıtýynsha, endi Qazaqstannyń qurylys naryǵynda tıisti zańnamanyń talaptaryna sáıkes keletin qurylys kompanııalary ǵana jumys isteıtin bolady.
