Qazirgi kezeńde shegirtkeler eginge eshbir qaýip tóndirmeıdi - Aýyl sharýashylyǵy mınıstri
ASTANA. 19 shilde. QazAqparat - Qazirgi kezeńde shegirtkeler eginge eshbir qaýip tóndirmeıdi. Bul týraly búgin Astanada "Veterınarlyq qaýipsizdik - Qazaqstannyń mal sharýashylyǵyn turaqty damytýdyń negizi" konferentsııasy barysynda tilshilerge QR Aýyl sharýashylyǵy mınıstri Asyljan Mamytbekov málim etti.
Eske sala keteıik, budan buryn habarlanǵanyndaı, Reseıden kóshken qara shegirtkeler Batys Qazaqstan, Aqtóbe jáne Qostanaı oblystarynyń egistik alqaptaryna túsken bolatyn. Osyǵan baılanysty QR Aýyl sharýashylyǵy mınıstrligimen osy oblystarǵa óńdeýlerdi júrgizý úshin qosymsha pestıtsıdter bólindi. Sondaı-aq Reseımen shekaralas aýmaqtardy tolyǵymen óńdeýge týra kelgen. Bul josparlanǵan óńdeýlerdiń kólemin 258,254 myń gektarǵa arttyryp jiberdi.
Osyǵan baılanysty QR Aýyl sharýashylyǵy mınıstrligi Reseıdiń Aýyl sharýashylyǵy mınıstrligine shekaralas aýmaqtardy óńdeý úshin shuǵyl sharalardy qabyldaý qajettigi týraly habarlama hat joldaǵan bolatyn.
«Búgingi tańda Reseı tarapynan eshbir jaýap kelgen joq. Bıylǵy jyl shegirtkelerdiń bıologııalyq sharyqtaý shegi. Zertteý jáne zalalsyzdandyrý jumystary Qazaqstan boıynsha atqarylyp jatyr. Bizde negizinen Reseımen shektesetin aýmaqtarda problema bar. Biraq qazirgi kezeńde shegirtkeler eshbir qaýip tóndirmeıdi», - dedi A. Mamytbekov.
Qazaqstannyń shekaralas aýmaqtarynyń málimetterine sáıkes, Reseı tarapynan hımııalyq óńdeýler jetkiliksiz kólemde jáne óte baıaý júrgizilýde. Sonyń saldarynan shegirtkelerdiń kópshiligi qanattanǵan kúıde jáne olardyń Qazaqstan aýmaǵyna jappaı ushyp-qoný faktileri oryn alýda.
