«Qazirgi kezdegi folklortaný, ádebıettaný jáne ónertanýdyń ózekti máseleleri» atty Halyqaralyq ǵylymı-teorııalyq konferentsııa uıymdastyrylady
ASTANA. 26 qyrkúıek. QazAqparat - Qazaqstan Respýblıkasy Bilim jáne ǵylym mınıstrligi Ǵylym komıteti M.O.Áýezov atyndaǵy Ádebıet jáne óner ınstıtýty 2011 jyldyń 27-28 qyrkúıek kúnderi Qazaqstan Respýblıkasy Táýelsizdiginiń 20 jyldyǵyna, sonymen qatar Instıtýttyń qurylǵanyna, Instıtýtqa halqymyzdyń uly jazýshysynyń esimi berilgenine 50 jyl tolýyna oraı «Qazirgi kezdegi folklortaný, ádebıettaný jáne ónertanýdyń ózekti máseleleri» atty Halyqaralyq ǵylymı-teorııalyq konferentsııa uıymdastyryp otyr.
Akademıkter Q.I.Sátbaev pen M.O.Áýezovtiń tikeleı aralasýymen 1961 jyly mamyr aıynda Qazaq SSR Ǵylym akademııasynyń Ádebıet jáne óner ınstıtýty quryldy. Osy jyldyń 27 maýsymynda Muhtar Áýezov qaıtys bolyp, tamyz aıynda uly jazýshynyń esimi ózi qurǵan ınstıtýtqa berilgen bolatyn.
Instıtýt qurylǵan ýaqytynan beri qazaq ádebıeti men folkloryn, ónerin zertteıtin bas ǵylymı mekemege aınaldy. Instıtýt ǵalymdary ulttyq ádebıet pen ónerdiń tarıhy men teorııasyn, asa kórnekti ádebıet jáne óner qaıratkerleriniń shyǵarmashylyq murasyn zertteýmen aınalysyp keledi. Ásirese, táýelsizdiktiń alǵashqy jyldarynda Alash qaıratkerlerin aqtaý, olardyń shyǵarmalaryn tabý, jınaý, jarııalaý isinde úlken eńbekter atqardy.
Halyqaralyq ǵylymı-teorııalyq konferentsııaǵa otanymyzdyń jáne Reseı, Tatarstan, Bashqurtstan, Túrkııa, Koreıa, Ózbekstan, Qyrǵyzstan elderinen kórnekti ǵalymdar qatysyp, ádebıettaný men ónertanýdyń keleli máseleleri boıynsha baıandama jasaıdy.
Konferentsııa 27-qyrkúıek kúni «Qazaqstan» qonaq úıiniń konferents-zalynda (Almaty, Dostyq dańǵyly, 52/2) ótedi, qonaqtardy tirkeý saǵat 9.00-de bastalady.
28-qyrkúıek kúni saǵat 10.00-de M.O.Áýezovtiń 50 tomdyq tolyq shyǵarmalar jınaǵynyń jaryq kórýine arnalǵan tusaýkeser rásimi ótkiziledi. («Áýezov úıi» ǴMO, M.Tólebaev kóshesi, 185)
