Qazirgi kezde jas mamandardy mektepke tartý jáne ustaý qıyn bolyp otyr - Qazaqstannyń Eńbek Eri Aıagúl Mırazova
ALMATY. Tamyzdyń 25-i. QazAqparat /Názıra Eleýhan / - Elimiz táýelsizdik alǵan alǵashqy jyldan bastap, bilim salasynyń damýyn basty nazarynda ustap, qoldaý kórsetip keledi. Elbasy qazaqstandyq jas urpaqtyń álemdik standartqa saı bilim alýy úshin qajetti jaǵdaı jasaýda.
Memleket mektep muǵalimderiniń rólin kóterýde jan-jaqty qoldaý kórsetip, bilim saıasatyna basymdyq berdi. Ustaz bedelin qoǵam aldynda kóterý úshin Elbasynyń tikeleı jarlyǵymen elimizdiń eń joǵarǵy marapaty - "Qazaqstannyń Eńbek Eri" ataǵy men "Altyn juldyz" belgisi jáne "Otan" ordeni eń birinshi ret ustazǵa berildi. Bul mektep muǵalimi eńbeginiń joǵary qurmetteletindiginiń aıǵaǵy. Bul týraly búgin Almatyda ótken bilim berý qyzmetkerleriniń tamyz keńesinde №159-shy gımnazııanyń dırektory, Qazaqstannyń Eńbek Eri Aıagúl Mırazova aıtty, dep habarlaıdy QazAqparat.
Onyń aıtýynsha, memleket árqashan ustazdarǵa qoldaý kórsetip, jylma-jyl jalaqylaryn kóterýde. "Muǵalim eńbegi naǵyz bedelge ıe bolýy úshin oǵan jaqsy mektep kerek. Bul jaǵynan da elimiz qarap otyrǵan joq. Bilim berý júıesiniń damýyna úlken serpin bergen "100 mektep, 100 emhana" baǵdarlamasy muǵalimniń eńbek etetin ornyn jaqsartýda", dep atap ótti Aıagúl Mırazova.
Onyń pikirinshe, bolashaqtyń taǵdyry ustazdardyń bilim deńgeıine baılanysty. "Muǵalimderge qoıylǵan talap ósken saıyn, onyń jaýapkershiligi arta túsýi tıis. Buny muǵalimderdiń barlyǵy túsinedi. Túsingendikten, urpaq tárbıesine adal qaraıdy. Olardyń balalarǵa degen súıispenshiligi, qoǵamǵa degen jaýapkershilik sezimderi órleı bermese, kemimeıdi", dedi ol.
Ustazdyń aıtýynsha, muǵalimder tarapyna aıtylatyn synmen qatar, muǵalim bedelin kóterý úshin, olardyń eńbekteri men tabystary BAQ-da nasıhattalýy tıis.
"Jańasha oqýdy júzege asyratyn negizgi kúsh - jas muǵalimder. Sondyqtan, olarǵa materıaldyq kómek kórsetip, qoldaý qajet. Qazirgi ýaqytta jas mamandardy mektepke tartý jáne ustaý qıyn bolyp otyr. Óıtkeni, olardyń jalaqylary ómir súrý qajetine jetkiliksiz. Buǵan tejeý jasaý úshin, attestatsııalaýǵa ózgerister engizý kerek. 5 jyl eńbek ótiline jetý úshin birshama ýaqyt qajet. Az jalaqymen bul mejege jetkenshe, kópshiligi qıyndyqqa shydamaı aýysyp, basqa qyzmetke ketip jatyr. Eger osylaı jalǵasa berse, 10 jyldan keıin mektepte mamandar budan da tapshy bolady", dep atap ótti qurmetti ustaz Aıagúl Mırazova.
