Qazirgi kezde bankter arqyly shetel azamattaryna JSN berilmeıdi - mınıstr

ASTANA. QazAqparat - Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ekinshi deńgeıdegi bankter arqyly shetel azamattaryna jeke sáıkestendirý nómirin (JSN) berý máselesine qatysty túsinik berdi, dep habarlaıdy QazAqparat tilshisi.

Atap aıtqanda, osy taqyryp boıynsha maýsym aıynda Májilis depýtattary atalǵan mınıstrlikke saýal joldady.

Óz jaýabynda B. Mýsın 2022 jylǵy úshinshi toqsannyń aıaǵynda JSN alýǵa ótinim bergen Reseı Federatsııasy azamattarynyń sany eleýli túrde óskenin habarlady.

Máselen, 2021 jyly 172 449 ótinish tússe, onyń ishinde 14 791-i nemese 8,6% Reseı azamattaryna tıesili. 2022 jyly 451 314 ótinish bolsa, sonyń 280 983-i nemese 59,7% Reseı azamattary. Al 2023 jyly 142 581 ótinish tirkelip, onyń ishinde 109 852-si nemese 61,8% Reseı azamattarynan kelip tústi.

«Osy oraıda júktemeni azaıtý úshin ýákiletti organ ІІM Kóshi-qon qyzmeti komıtetiniń kelisimi boıynsha ekinshi deńgeıdegi bankter arqyly JSN berý jónindegi ýaqytsha sheshim jasaldy. Qazirgi kezde ekinshi deńgeıdegi bankter arqyly shetel azamattaryna JSN berý jónindegi qyzmet túri atqarylmaıdy», - dedi mınıstr.

Onyń aıtýynsha, bank fılıaldary arqyly atalǵan kezeńde 5 680 ótinish qabyldanyp, 4 521 JSN berilgen. Sonymen qatar, bankter sheteldik azamattarǵa JSN berý nemese odan bas tartý týraly sheshimdi ózderi qabyldaǵan joq. Memlekettik korporatsııanyń derekteri boıynsha qujattardy qabyldaý boıynsha talaptardy buzý faktileri anyqtalmady.

«Bul rette JSN-niń bar-joǵyna qaramastan, shetel azamatyn sáıkestendirý onyń ulttyq pasporty nemese zańnamada belgilengen ózge de qujat negizinde júzege asyrylýy tıis. ıAǵnı, bank kartochkasyn alǵan kezde, bank qyzmetkeri klıentti jeke basyn kýálandyratyn qujattar boıynsha sáıkestendiredi», - dedi Baǵdat Mýsın.

Budan bólek, atalǵan depýtattyq saýalǵa bergen jaýabynda Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı shetel azamattaryna JSN berý memlekettik qyzmet sanatyna jatatynyn jáne ony berý tártibi tıisti Qaǵıdamen reglamenttelgen eske saldy.

«Ekinshi deńgeıdegi bankterdiń shetel azamattaryna JSN berýi Qaǵıdalarda eskerilmegen», - dedi agenttik basshysy.