Qazirgi eki zańnyń Konstıtýtsııaǵa eshbir qatysy joq - Ádilet mınıstrligi
«Osy bastamanyń aıasynda Prezıdenttiń birqatar ókilettilikterin Úkimetke berý kózdelgen. Birinshiden, búginde respýblıkalyq bıýdjettik komıssııany Memleket basshysy bekitse, endigi kezekte atalǵan mindetti Úkimetke berý josparlanyp otyr. Sebebi bıýdjet qarjysynyń ıgerilýine onsyz da Mınıstrler kabınetiniń ózi jaýapty. Sosyn respýblıkalyq bıýdjetti atqarý tártibin de Úkimettiń moınyna júktelmek», - deıdi Baımoldına.
Budan bólek, keıbir konstıtýtsııalyq zańdarǵa ózgerister men tolyqtyrýlar engizý aıasynda Úkimettiń Prezıdentke ǵana emes, Parlamentke de esep berýi qarastyrylǵan.
Mınıstrler kabınetiniń músheleri depýtattardyń aldynda atqarylǵan jumystarmen birge bıýdjettiń atqarylýy boıynsha esep beretin bolady. Ekonomıkanyń basymdy baǵyttaryn da Úkimettiń ózi anyqtaıdy. Osyǵan baılanysty jaýapkershilik te artatyn bolady.
«Bılik tarmaqtary arasynda ókilettilikterdi qaıta bólý máselelerine arnalǵan eki zań jobasynyń Konstıtýtsııaǵa engiziletin ózgeristerge eshbir qatysy joq. Ol máselege qatysty bólek zań jobasy bolýy shart», - dep atap kórsetti vıtse-mınıstr.
Aıta keteıik, bılik tarmaqtary arasynda ókilettilikterdi qaıta bólý jumysy aıasynda birinshi zań tujyrymdasymen 4 kodekspen 21 zańǵa ózgerister engizý kózdelip otyr. Al ekinshi tujyrymdama boıynsha 3 konstıtýtsııalyq zańdy ózgertý kerek. Vıtse-mınıstr Záýresh Baımoldınanyń aıtýynsha, naýryzdyń 15-sine deıin atalǵan eki zań jobasyn Parlamenttiń qaraýyna engizý kózdelip otyr.
Qujattardyń tolyq ataýy - "QR keıbir zańnamalyq aktilerine memlekettik bıliktiń tarmaqtary arasynda ókilettilikterdi qaıta bólý máseleleri boıynsha ózgerister men tolyqtyrýlar engizý týraly" zań jobasynyń tujyrymdamasy jáne "QR keıbir konstıtýtsııalyq zańdaryna memlekettik bıliktiń tarmaqtary arasynda ókilettilikterdi qaıta bólý máseleleri boıynsha ózgerister men tolyqtyrýlar engizý týraly" zań jobasynyń tujyrymdamasy. Atalǵan eki qujatty da ádilet mınıstrligi ázirlep otyr. Buǵan deıin ótken zań jobalaý qyzmeti máseleleri jónindegi vedomstvoaralyq komıssııanyń kezekti otyrysynda Baımoldına hanym bılik ókilettilikterin qaıta bólgennen keıin Úkimet músheleriniń jaýapkershiligi qalaısha ózgeretini jaıynda aıtyp bergen .
