Qazirgi bessaıystan Azıadaǵa baratyn sportshylar anyqtaldy

ASTANA. QazAqparat - Indonezııa astanasy Djakartada ótetin jazǵy Azııa oıyndaryna qazirgi bessaıystan el namysyn qorǵaıtyn sportshylar esimi belgili boldy, dep habarlaıdy QazAqparat tilshisi.

QR Ulttyq Olımpıada komıteti taratqan málimetterge súıensek, qazirgi bessaıystan Qazaqstan ulttyq quramasynyń músheleri Belarýstiń Mınsk qalasynda oqý-jattyǵý jıyndaryn ótkizip jatyr.

Astanada qazirgi bessaıystan álem kýboginiń fınaly ótken soń, Qazaqstan quramasy Azııa oıyndaryna tyńǵylyqty daıyndyqty bastap ketti.

Bas bapker Vadım Chýdnovskıı Azıadada myna sportshylarǵa úmit artyp otyr:

Pavel Ilıashenko

Alena Potapenko

Vlad Sýharev

Ardaq Ahıdýllaeva

Azııa oıyndary aıaqtalǵan soń Qazaqstan quramasy qysqarǵan quramda Mehıkoda ótetin álem chempıonatyna attanady. Dúnıejúzilik dodada Ilıashenko men Potapenko aralas estafetada óner kórsetpek.

Eske sala keteıik, Jazǵy Azııa oıyndary Djakartada (Indonezııa) 18 tamyz ben 2 qyrkúıek aralyǵynda ótedi.