Qazirgi baǵdarlamalarymyzdy oryndaý barysynda halyqtyń ál-aýqaty budan da jaqsarady - Elbasy

ASTANA. 4 sáýir. QazAqparat /Marlan Jıembaı/ - Qazirgi baǵdarlamalarymyzdy oryndaý barysynda halyqtyń ál-aýqaty budan da jaqsarady dep sanaımyz. Búgin Aqordada otandyq jáne sheteldik buqaralyq aqparat quraldarynyń ókilderine arnalǵan baspasóz máslıhatynda Elbasy Nursultan Nazarbaev osylaı málimdedi.

Qazaqstannyń kemel bolashaǵy 2030 jylǵa deıingi strategııada jazylǵan ári ol qazaqstandyqtarǵa belgili ekendigin basa aıtqan Elbasy: «El basqarýdaǵy barlyq qyzmetimdi pesheneme jazylǵan Qazaqstannyń jańa memleketin qurý, onyń órkenıetti eldermen terezesin teń etý, ekonomıkasyn túzep, halyqtyń ál-aýqatyn jaqsartýǵa jumsaǵanymdy ózderińiz bilesizder. Sondyqtan qazirgi baǵdarlamalarymyzdy oryndaý barysynda halyqtyń ál-aýqaty budan da artyq túzeledi dep sanaımyz», - dedi.

Memleket basshysy jumys istegisi keletin aýyldaǵy aǵaıynǵa shaǵyn nesıeler beriletindigin, aýyl sharýashylyǵynda jumysy joq adamdardy memleket tegin oqytyp, jumysqa ornalastyrýǵa nıet tanytyp otyrǵandyǵyn atap ótti. Sondaı-aq turǵyn úı qurylysyn jandandyryp, qarapaıym halyqtyń, ásirese jastardyń páter alatyndaı jaǵdaıǵa jetkizý, ár januıanyń balasynyń jaqsy balabaqshada tárbıelenip, jaqsy mektepte bilim alýy, jaqsy aýrýhanada emdelýi máselelerine de basa nazar aýdarylatyndyǵyn aıtty. «Osynyń barlyǵy bizge eldiń ál-aýqatyn kóterýge múmkinshilik beredi», - dedi N.Nazarbaev.