«Qazirgi aıtystan halyq qajı bastady»- BAQ-qa sholý
***
«Tarıhta tuńǵysh ári osy kúnge deıin tek bir ózi atom qarýynan bas tartqan jalǵyz memleket - Qazaqstan atomdy beıbit maqsatta paıdalanýdy, joıqyn qarýdan bas tartýdy qandaı minberden de aıtyp, adamzat balasy úshin ıgiligi mol osy joldan taımaǵan birizdi saıasat ustanyp keledi. Semeı synaq alańynyń zardabyn shekken qazaq dalasynyń jarasy jazylar, biraq álemde ıadrolyq synaqtar ótkizý toqtalmaı jatqan ýaqytta ony aıyptamaı otyrý da keshirilmeıtin kúná. Tómendegi maqala aǵylshyn tilinde jaryq kórse, oǵan álemdik BAQ-tar nazar aýdaryp, jarııalap jatyr. Biz óz oqyrmandarymyz úshin maqalanyń qazaq tilindegi nusqasyn usynǵandy jón kórdik»,-dep jazady «Egemen Qazaqstan» basylymy búgingi sanyndaǵy «Bul - jalpyǵa ortaq problema» atty maqalada. Búginde jer júzinde 19 myń ıadrolyq oqtumsyqqa ıe toǵyz el bar, ıaǵnı álem ıadrolyq qarýdan keletin alapatty bir sát te esterinen shyǵarmaýlary kerek. Biz Soltústik Koreıanyń ıadrolyq qarýdy synaqtan ótkizgeni týraly estigenimizde, tóbe shashymyz tik turdy. Bul ıadrolyq qarýdy qoldaný yqtımaldylyǵyn jaqyndata túsedi.
Osy basylymnyń jazýynsha, Qazaqstan musylmandary dinı basqarmasynyń burynǵy tóraǵasy, sheıh Ábsattar qajy Derbisáli Almatydaǵy Shyǵystaný ınstıtýtynyń dırektory qyzmetine taǵaıyndaldy. Instıtýt qyzmetkerlerine jańa basshyny Bilim jáne ǵylym mınıstri Baqytjan Jumaǵulov tanystyryp, Ábsattar qajy Derbisáliniń shyǵystaný salasyna qosqan úlesi men eńbegin atap ótti. Bul materıal «Dırektorlyqqa taǵaıyndaldy» degen taqyryppen berilip otyr.
***
«Aıqyn» gazetiniń búgingi sanynda «Maqtanǵandy unatpaıtyn rejısser el týraly 100 serııaly derekti fılm túsirmek» degen taqyryppen materıal berilgen. Basylymnyń jazýynsha, qazir ol eltaný baǵytyndaǵy «Qazaqstan - álemniń toǵyzynshy terrıtorııasy» atty fılmin túsirip jatyr. «Men bul fılmdi 100 serııaǵa jetkizgim keledi. Osy fılm arqyly dúnıejúzine Qazaqstannyń tarıhyn, salt-dástúrin, ádet-ǵurpyn, tabıǵatyn tanytqym keledi»,-deıdi aqyn, kınorejısser, stsenarıst Baqyt Qaıyrbekov.
«Aıtysta kórinbeı ketkenimniń bir sebebi, qatty syrqattanyp qaldym. Uzaq ýaqyt tósek tartyp jattym. Endi esimdi jınap, alaman aıtysqa qatysamyn dep júrgenimde, oıda-joqta ákeı qaıtys boldy. Esimdi jınaı bergenimde anam ómirden ótti. Osylaısha biraz ýaqyt jurt meni «joǵaltyp» aldy»,-deıdi aıtysker aqyn Qaýanysh Maqsutov «Aıqyn» basylymyna bergen suhbatynda. Bul suhbat kópshilik nazaryna «Qazirgi aıtystan halyq qajı bastady» degen taqyryppen usynylǵan.
***
«Kazahstanskaıa pravda» gazetiniń jazýynsha, Keshe Qazaqstan Prezıdenti Nursultan Nazarbaev Almatydaǵy rezıdentsııasynda Iran Islam Respýblıkasy ulttyq qaýipsizdigi joǵary keńesiniń hatshysy Saıd Djalılıdi qabyldady. Kezdesý BUU Qaýipsizdik Keńesine múshe bes memlekettiń, Germanııa men Irannyń ókilderiniń qatysýymen Almatyda ótetin Iran ıadrolyq baǵdarlamasy jónindegi kelissózderdiń kezekti raýndy qarsańynda ótti. Kezdesýde Memleket basshysy ıadrolyq synaqtardyń barlyq aýyrtpalyǵyn óz basynan ótkergen Qazaqstannyń jahandyq ıadrolyq qaýipsizdik máselelerinde aıtarlyqtaı mańyzdy ról atqaratynyn atap ótti. Nursultan Nazarbaev elimiz kelissózder úderisine qatysýshylarǵa alań usyna otyryp, onyń qorytyndysy boıynsha mámilege qol jetkiziledi jáne kelispeýshilikterdi retteýde eleýli ilgerileý bolady dep úmittenetinin atap kórsetti.
