Qazirgi álemde tózimdiliktiń orny aıyryqsha - QR Mádenıet jáne aqparat mınıstrligi
«Atalǵan forým Qazaqstannyń Ortalyq Azııada etnosaralyq jáne mádenıetaralyq suhbatty nyǵaıtý boıynsha maqsatty túrde jasap jatqan tıimdi jumysynyń jalǵasy bolyp tabylady»,-dep atap ótti Qazaqstan halqy Assambleıasy Tóraǵasynyń orynbasary Eraly Toǵjanov.
E. Toǵjanovtyń sózine qaraǵanda, forýmda Qyrǵyzstan, Tájikstan, Ózbekstan elderiniń ókilderi, sondaı-aq Túrkııanyń, Iran jáne Eropalyq odaq elderinen ǵylymı-qoǵamdyq toptar men mamandar qatysýda.
Al Qazaqstan jaǵynan sharaǵa belgili qoǵam qaıratkerleri, depýtattar, ÚEU ókilderi shaqyryldy.
«Toleranttylyq taqyryby álemde óte kóp ári belsendi talqylanýda jáne bul másele mańyzdy. Atap aıtqanda, qazirgi álemde tózimdiliktiń orny aıyryqsha. Sondyqtan da mádenıet jáne aqparattyq saıasat máselesimen aınalysatyn bizdiń mınıstrlik basymdyqtarynyń biri toleranttylyqtyń qundylyqtary men rýhyn kúsheıtýge negizdelgen. Shyn máninde tózimdilik eleýli negizder men aýqymdy jumystardy qajettilik etedi. Osy oraıda Qazaqstan úlken úlesin qosyp keledi, ıaǵnı bul turǵyda ıadrolyq qarýdan bas tartýdan bastap, elimiz tarapynan usynylǵan basqa da jahandyq bastamalardy atap ótken jón»,-dedi forým barysynda QR Mádenıet jáne aqparat mınıstrliginiń jaýapty hatshysy Janna Qurmanǵalıeva.
Jıyn barasynda «G-GLOBAL: jańa álem men álemdik tynyshtyq ustanymdary», «Ortalyq Azııadaǵy beıbitshilik, turaqtylyq jáne qoǵamdyq kelisim máseleleri», «Polıetnıkalyq qoǵamdaǵy medıatsııa: múmkindikter men bolashaǵy», «Áleýmettik jańǵyrtý: etnosaralyq tózimdilik pen qoǵamdyq kelisim úlgisin damytýdyń quqyqtyq jáne qoǵamdyq tetikteri», «Toleranttylyq jáne BAQ» taqyryptaryna pikirsaıystar ótip jatyr.
Forýmdy Qazaqstan halqy Assambleıasy men QR Mádenıet jáne aqparat mınıstrligi uıymdastyrdy.
