Qazirge kezdegi eń basty másele - memleketimizdiń qaýipsizdigi - «Ákeler odaǵynyń» tóraǵasy
Spıkerdiń sózinshe, eń aldymen mindetti túrde aýyl jastarymen jumys isteý kerek.
«Prezıdent bilimge basa nazar aýdardy. Mindetti túrde aýyl jastarymen, qazaq tildi jastarmen jumys isteý kerek dep oılaımyn. Bilimmen qatar, tárbıe de qajet. Aýyl jastary men qala jastarynyń problemasy ekeýi eki túrli. Áleýmettik jaǵynan qaraıtyn bolsaq, ókinishke oraı úlken dısproportsııa bar. Kezinde bizde Óńirlik damý mınıstrligi bolǵan. Sony beker jaýyp tastady. Olar óńirlermen jumys isteıtin edi»,- deıdi Maqsutbek Aıtmaǵanbet.
Onyń aıtýynsha, halyqqa qazirgi tańda eń keregi – qaýipsizdikti seziný.
«Qazirge kezdegi eń basty másele - memleketimizdiń qaýipsizdigi. Kórip otyrǵandaı, ózge eldiń qarýly kúshterine júginip otyrmyz. Buǵan májbúr boldyq, ondy endi túsinip, kózimiz jetip otyr. Sondyqtan, aıtylǵan zattardyń eń aýqymdysy - elimizdiń qaýipsizdik organdarynyń reformasy. UQK, Ulttyq ulan , ásker, polıtsııa tolyǵymen memleketimizdiń táýelsizdigin qorǵaýǵa árdaıym daıyn bolýy kerek. Sabotaj boldy. Sondyqtan, bul másele - eń ózekti másele. Árbir qazaqstandyq óz qaýipsizdigin, otbasynyń qaýipsizdigin sezbese, qaýipsiz elderge kete bastaıdy. Osy másele mańyzdy, qalǵandary sheshilip jatar», - dedi «Ákeler odaǵy» respýblıkalyq qoǵamdyq birlestiginiń tóraǵasy.
Sonymen qatar, ol beıbit sherýge shyqqan adamdardy terrorıstermen aralastyrmaý kerek ekenin tilge tıek etti.
«Beıbit sherýge shyqqan adamdardy terrorıstermen aralastyrmaý kerek. Olardy lańkester men halyqqa qarsy shyqqan elementter qoldanyp ketti. Qazir on myńǵa jýyq adam qamaýǵa alyndy dep jatyr. Solardyń ishindegi beıbit sherýge shyqqan adamdar da bar shyǵar, solar jazaǵa tartylyp ketpese eken. Ashyq sot bolý kerek dep oılaımyn. Al, terrorısterdi árıne sottaý kerek», - deıdi ol.
Maqsutbek Aıtmaǵanbet «Halyq únine qulaq asatyn memleket» tujyrymdamasyna qatysty oıyn bildirdi.
«Halyqtyń kókireginde júrgen saýaldar men el aýyzynda talaı ýaqyt aıtylyp júrgen nárselerdi Prezıdenttyń aıtqanyna rızamyn. Barlyq máseleler budan bylaı tek qana ashyq aıtylyp, ashyq talqylanýy kerek. Qazaqta «Halyq aıtsa, qalt aıtpaıdy» degen sóz bar, sony umytpaıyq. «Halyq únine qulaq asatyn memleket» tujyrymdamasy durys. Biraq, estigendi tez arada zerdelep, máseleni túsinip, naqty sheshimder qabyldanýy qajet», - dedi spıker.
