Qazirdiń ózinde ýrandy óndirýdiń teńdestirilgen deńgeıin qamtamasyz etý qajet - D. Turǵanov
Búgin Astanada ótip jatqan Birinshi Qazaqstandyq Halyqaralyq Ónerkásiptik Innovatsııalyq Forým sheńberinde uıymdastyrylǵan «Qazaqstandaǵy atom salasynyń jaǵdaıy jáne onyń damý perspektıvalary» atty halyqaralyq konferentsııada Indýstrııa jáne jańa tehnologııalar vıtse-mınıstri Dúısenbaı Turǵanov osylaı málim etti.
«Atom salasy Qazaqstan ekonomıkasynyń perspektıvaly ári ǵylymdy kóp qajet etetin mańyzdy salasynyń biri bolyp tabylady. Sondaı-aq, atom salasyn damytý máselelerin sheshý memleketimizdiń strategııalyq mańyzdy mindeti. Byltyr qabyldanǵan Údemeli ındýstrııalyq-ınnovatsııalyq damýdyń memlekettik baǵdarlamasynda da atom salasyna basymdyq berilgen bolatyn. Onyń ústine Qazaqstan qazirgi tańda ýrannyń baı qoryna ıe jáne osyny ıgerýdi tabysty júrgizip keledi. Ýranǵa álemdik suranystyń artýyn jáne keleshektegi túpki ónimge baǵanyń ósýin esepke ala otyryp, búgingi kúnniń ózinde ýrandy óndirýdiń teńdestirilgen deńgeıin qamtamasyz etý qajet dep bilemiz. Bul rette asa qymbat turatyn ıadrolyq otyn óndirisin qurý tsıklyna nazar aýdarǵannyń mańyzy zor», - dedi D. Turǵanov. Onyń aıtýynsha, qazirgi kúni birqatar sheteldik kompanııalar «QazAtomÓnerkásip» UK birlese otyryp Qazaqstan aýmaǵynda ýran óndirý jumysyn júrgizip keledi. Bul rette sheteldik kompanııalarmen Qazaqstannyń qatysýymen joǵary tehnologııaly ıadrolyq tehnologııalyq tsıkldar salý jóninde birqatar memorandým men kelisimderge qol qoıylǵan.
