Qazirdiń ózinde tehnologııalyq bıznes-ınkýbator baǵdarlamasy boıynsha 80-ge tarta ótinish kelip tústi - «Ulttyq ınnovatsııalyq qor» AQ
TANA. 3 tamyz. QazAqparat /Qanat Mámetqazyuly/ - Aǵymdaǵy jylǵy 25 shildeden bastalǵan tehnologııalyq bıznes-ınkýbator baǵdarlamasy boıynsha 80-ge tarta ótinishter kelip tústi.
Bul týraly búgin atalǵan baǵdarlama jóninde ótken baspasóz máslıhaty barysynda «Ulttyq ınnovatsııalyq qor» AQ Basqarma tóraǵasynyń orynbasary Ánýarbek Sultanǵazın málim etti.
Á. Sultanǵazınnyń aıtýynsha, baǵdarlama boıynsha tapsyrystardy qabyldaý merziminiń endi bastalǵanyna qaramastan, buǵan degen belsendilik artyp otyr. «Byltyr baǵdarlama boıynsha 245 mln. teńge bólinip, 105 ótinishtiń ishinen 36 joba maquldanǵan edi. Bul baǵyttaǵy sharalar ınnovatorlar arasynda jaǵymdy pikir qalyptastyra aldy dep oılaımyn. Buǵan dálel - qazirdiń ózinde pysyqtaı túsý úshin óńirlerdegi tehnoparkterge 80-ge tarta ótinish kelip tústi», - dedi Á. Sultanǵazın.
Al baǵdarlamany júzege asyrý máselelerine toqtalǵan Innovatsııalyq ınfraqurylymdy damytý ortalyǵynyń dırektory Sergeı Mogılnyı konkýrstyq irikteýden ótken ınnovatsııalyq jobalarǵa servıstik qoldaý boıynsha keshendi quraldar jıyntyǵy usynylatynyn málim etti. Atap aıtqanda, qatysýshylarǵa bıznes-jospar ázirleýden bastap, ony júzege asyrý barysyndaǵy bilikti konsýltatsııalarǵa deıingi qyzmetter kesheni kórsetiletin bolady.
«Bekitilgen úderister boıynsha ótinish jasaýshy óz qalaýynsha qajetti qyzmetter tizimi men aýqymyn tańdap alady. Bul rette endi ǵana isti qolǵa alǵan bıznesmenderge olardyń ınnovatsııalyq jobalaryn júzege asyrý úshin keńse ǵımarattary, jabdyqtar, býhgalterlik, quqyqtyq, ekonomıkalyq, aqparattyq, marketıngtik qoldaýlar, sondaı-aq ınnovatsııalyq kompanııanyń tabysty damýy úshin qajetti sanalatyn menedjerlik qyzmetter de usynylady. Osyǵan oraı, óńirdegi tehnopark qyzmetkerleri ózderine usynyspen shyqqan ınnovatorlarǵa áriptester men ınvestorlar tabý jaǵynan járdemdesetin bolady. Innovatsııany júzege asyrý úshin kelissózder uıymdastyryp, qoldaýlar jasalady. Budan bólek, baǵdarlama aıasynda ınnovatsııalyq ónim úlgilerin jasaý shyǵyndary da qarjylandyrylýy, olardy synaqtan ótkizý máseleleri de qamtylýy múmkin», - deıdi Ortalyq dırektory S. Mogılnyı.
