Qazirdiń ózinde respýblıka boıynsha 150 mlrd. teńgege jýyq qarajat ıgerilmeı jatyr - N. Nazarbaev

Búgin Astanada «A» bacqarýshylyq korpýsynyń memlekettik qyzmetshilerimen keńes ótkizgen QR Prezıdenti Nursultan Nazarbaev osylaı málim etti.

«Bizde halyqty taza aýyz sýmen qamtamasyz etýge baǵyttalǵan arnaıy memlekettik baǵdarlama bar. Aýyz sý halyq densaýlyǵynyń kepili. Ókinishke qaraı, osyndaı mańyzdy isterge bólingen bıýdjet qarajaty ıgerilmeı jatyr. Osylaısha, Qazaqstan boıynsha aǵymdaǵy jyly 150 mlrd. teńge ıgerilmeı qalyp jatyr. Bul qarajattyń barlyǵy oblystarǵa, jergilikti jerlerdegi mektep, aýrýhana, taza aýyz sýmen qamtamasyz etý sekildi áleýmettik nysandarǵa arnalǵan. Alaıda, olar ıgerilmeı jatyr, sondyqtan da biz ondaı qarajattardy qaıtaryp alyp jatyrmyz», - dedi N. Nazarbaev.

Budan bólek, Elbasy densaýlyq saqtaý salasynda da kemshilikter ketip jatqanyn atap ótti. Máselen, qyrýar qarajattardy qamtıtyn aýqymda aýrýhanalar, zamanaýı mektepter salynýda. Alaıda, onda jumys isteıtin mamandar tapshy, joqtyń qasy. «Sondyqtan da, men jastardy ýnıversıtetten soń aýylǵa barýǵa shaqyrdym. Ondaı jas mamandarǵa jeńildikter jasalýda. Mine, solaı qyzmetke baryp, aýylǵa sińgen mamandar jergilikti ıntellıgentsııanyń súıegine aınalady. Jalpy, qaı kezde de aýyl, ondaǵy mektep pen aýrýhana qyzmetkerleri bilimdi adamdardyń ortalyǵy bolyp sanalýshy edi. Sondyqtan da ár nárseni barynsha qarapaıymdylyqtan bastaý kerek. Al bizdiń jumysymyzdyń sapasynyń ózi osyndaı usaq-túıek máselelerden qalanady», dedi Elbasy.