Qazirde satıra teatrlarynda akterlerdiń oıyny azaıyp bara jatyr - Asqar Naımantaı
ALMATY. 28 sáýir. QazAqparat - Almatydaǵy «Beımaral» kúlki kompanııasynyń satıralyq-estradalyq teatry Ospanhan Áýbákirovtyń «Terisqaqpaı» qoıylymyn sahnalamaq.
Kúlki kompanııasy eki jyl buryn Muhtar Áýezov atyndaǵy Qazaqtyq memlekettik akademııalyq drama teatrynda tusaýyn kesken bolatyn.
«Satıralyq-estradalyq baǵytty ustanyp otyrǵan jańa teatrdyń ázirge naqty ataýy joq. 24 sáýirde Ómirbek Joldasbekov atyndaǵy Stýdentter saraıynda «Máz meıram» dep atalatyn alǵashqy keshimizdi ótkizdik. Bizdiń teatr óner ordasynan kásibı bilim alǵan akterlerden quralyp otyr. Onda ózge ujymdardaǵydaı Kóńildi tapqyrlar klýbynan ne túrli toı-tomalaqtan tanymal bolǵan artıster joq», - deıdi teatrdyń rejısseri jáne kórkemdik jetekshisi Asqar Naımantaı. Onyń aıtýynsha, «Beımaral» kúlki kompanııasy endi kontserttermen shektelip qalmaı, mýzykalyq-komedııalardy sahnalap, qysqa metrajdy kınokomedııalar túsirýdi qolǵa almaq. Oǵan qazirgi tańda adam kúshi de tehnıkalyq múmkindikter de qalyptasqan.
«Bizdiń basty maqsatymyz - jastar teartryn qurý. Qazir satıralyq teatrlardyń kópshiligi jeńil ázil-qaljyńǵa qaraı oıysyp bara jatyr. Onda akterlik oıyn azaıyp ketti. Bul olqylyqtyń ornyn toltyrý úshin óz tarapymyzdan satıraǵa kóbirek mán bermekpiz», - dedi A.Naımantaı.
