Qazir vokal ónerinde praktıka men teorııa eki baǵytta damyp kele jatyr - Tolqyn Zabırova
ALMATY. 23 mamyr. QazAqparat - Vokaldy pedagogıkada qazir jaýaby tabylmaǵan suraqtar óte kóp. Bul týraly QR Eńbek sińirgen qaıratkeri, Temirbek Júrgenov atyndaǵy Qazaq óner akademııasynyń professory Tolqyn Zabırova búgin Almatyda «Ulttyq
vokaldyq mektepti qurý: jańa paradıgmalardy izdeý» dep atalatyn monografııalyq zertteýiniń tusaýkeseri barysynda aıtty.
«Qazir vokal ónerinde ǵylym jaǵynan kóptegen suraqtar qordalanyp qaldy. Qoldanystaǵy paradıgma onyń bárine jaýap bere almaı otyr. Praktıkter ánshiler bir jolda, teorııashylar ekinshi jolda bir-birine qosylmaı, árqaısysy ózinshe damýda. Daýysty psıhologııalyq emotsııanaldy quramnan bólýge bolmaıdy. Bul kitapta ony birdeı kórip, psıholoııalyq fızıkalyq úderis retinde daýysqa jańasha qarap, jańa paradıgma týraly óz pikirimdi bildirip otyrmyn. Onyń ózindik qupııalary bar. Sondyqtan eski paradıgmany ózgertý kerek», - deıdi ónertaný ǵylymynyń kandıdaty T. Zabırova. Tolqyn Qalıqyzynyń aıtýynsha, qazaqtyń halyq ánderin oryndap júrgen ánshilerdiń arasynda onyń mánin de, sózin de durys uǵynbaıtyndar kóp. Qazaq tiliniń fonetıkalyq ereksheligine jas ánshilerdi oqý ornyna kelgen kezde jattyǵýlarmen jáne ádistememen arnaıy oqytý kerek.
