Qazir Túrkııadaǵy jaǵdaıdy tolyqqandy baǵalaý múmkin emes - qazaqstandyq kýáger
ASTANA. QazAqparat - Ystambuldaǵy jaǵdaı boıynsha telearnalar oqıǵa oryndarynan aqparattar berýde, olardy kóre otyryp bolyp jatqan oqıǵany tolyqqandy baǵalap shyǵý múmkin emes, deıdi Túrkııada bilim alyp júrgen qazaqstandyq Nurat Іlııas.
Ol Ystambul ýnıversıtetinde 3 jyldan beri túrkologııa mamandyǵy boıynsha doktorantýrada oqıdy.
Onyń aıtýynsha, keshegi oqıǵalar bastalǵan kez jergilikti ýaqytpen keshki saǵat 20-21 shamasy. Bastapqyda áýede áskerı ushaqtar men tikushaqtardyń ushýy jıilep ketken. Alaıda ol bul áskerı oqý-jattyǵý shyǵar dep mán bermegen. Túngi 23-ter shamasynda BAQ jańalyqtarynan soń ǵana elde áskerı tóńkeristiń bastalǵany belgili bolǵan.
«Qazir dúrbeleń birshama saıabyrsydy. Úkimetke qoldaý bildirýshiler Túrkııanyń týyn ustap ortalyqtaǵy alańdarǵa attandy, sol jerde jaqtastarymen bılikke qoldaý kórsetýde. Olardyń qatarynda túrkııalyq baıyrǵy turǵyn qazaqtar da bar», deıdi N.Іlııas.
Birqatar aqparat agenttikter osy ýaqytta Túrkııada áleýmettik jelilerdiń jumysy shekteldi dep jarııa etken. Alaıda Ystambulda ınternet jyldamdyǵy tómendegenimen óshpegen, keıin tańǵa qaraı onyń jyldamdyǵy qalpyna kelgen.
Bir-eki saǵat buryn telearnalar jumysy belsendirek bolyp, BAQ oqıǵa oryndarynan aqparattar, beınekórilimder bere bastaǵan. Aqparattyń kóptigi, ári sanalýandyǵy naqty oqıǵany tolyqqandy baǵalaýǵa múmkindik bermeı otyr, deıdi Nurat Іlııas.
Ol kórip-bilgenderin Feısbýktegi paraqshasynda jarııalap otyrdy.
© sýret Nurat Іlııastyń paraqshasynan alyndy
