Qazir temirdeı tártipke baǵynýymyz kerek – Abylaı Maýdanov
Aqynnyń aıtýynsha, jańa jyl merekesi qarsańynda turǵyndar otbasylyq is-sharalardy jıiletedi. Alaıda, qazir toı-tomalaqtardyń ýaqyty emes. Sondyqtan sanıtarlyq talaptardy qatań saqtaý kerek.
«Mamandar epıdemıologııalyq ahýal jazǵy ýaqytpen salystyrǵanda ájeptáýir turaqtalǵanymen, vırýs qaýpi áli joǵary ekenin aıtady. Sóıte tura keıbir kásipkerlik sýbektileriniń indet qaýpine salǵyrt qaraýy jáne shekteý talaptaryn birneshe márte buzýy qynjyltady. Ázirshe toı-tomalaqtarǵa tyıym salynǵan. Erte me, kesh pe, qýanysh-toılarǵa ruqsat etiler. Biz endigi jerde temirdeı tártipke, muntazdaı tazalyqqa, joǵary jaýapkershilikke baǵynýymyz qajet. Óıtpese, qıyn-aq.Álemdi ábigerlendirip, dúnıeni dúrliktirgen juqpaly indet árqaısymyzdy odan saıyn oılandyrýǵa tıis. Qanshama aıaýlylarymyzdan aıyryldyq. Bir qazaq týsa, bar qazaq qýanatyndaı, bir qazaq ómirden ótse, bar qazaq qaıǵyratyndaı kúıdemiz. Tyıym salynǵan toı-tomalaqtardan, basqa da jıyndardan, tipti janazalardan qaraýly, qalyń vırýs juqtyryp qaıtys bolǵandar az emes. Aldaǵy aılar men jyldar jaqsylyqtar ákelgeı. Alaıda, báribir, qaterli pandemııadan keıin jan-jaqty ózgerýimiz kerek. Bılik ózgersin, ózgeler ózgersin dep ózeýreı bermeı, ózimiz ózgermekke mindettimiz», - deıdi Abylaı Maýdanov.
Aqyn sózine súıensek, qaıtkende de toı ótpeı turmaıdy, otbasylyq merekelerge ruqsat beriledi. Biraq osy indet halyqty ysyrapshyldyqqa jol bermeı, negizsiz otyrystar jasamaýǵa úıretti. Sondyqtan atqarýshy bılik ókilderi azamattardy jeke qaýipsizdik sharalaryn saqtaýǵa shaqyrady. Ásirese jalpyhalyqtyq merekeler qarsańynda sanıtarlyq talaptardy saqtaýdyń mańyzy zor. Eger ony ustanbasaq, pandemııaǵa qarsy kúreste oń nátıje bolmaıdy.
