Qazir táýelsizdigimiz ben konstıtýtsııalyq qurylymymyzdy nyǵaıtatyn ýaqyt – general-maıor Álibek Serálıev
«Prezıdent Joldaýyn muqııat tyńdaǵannan keıin bir baıqaǵanym, elimiz demokratııalyq turǵydan jańarý jolyna tústi», - dedi Á.Serálıev.
General-maıordyń aıtýynsha, adam quqyqtary men sóz bostandyǵy – basty qundylyq. Onyń negizgi temirqazyǵy – quqyqtyq memleketti nyǵaıtý, zań ústemdiginiń saltanat qurýy. Demek, qandaı jaǵdaı bolmasyn, adamdyq konstıtýtsııalyq quqyqtar prıntsıpinde, zań aıasynda sheshilýi kerek. Memleket basshysy ókilettiligin asyra paıdalanǵan quqyq qorǵaý qyzmetkerleriniń áreketin aıyptaǵanymen, syn saǵatta el qorǵaǵan polıtsııa qyzmetkerleri men áskerı qyzmetkershilerdiń erligin eskerip, Otan qorǵaýshylardyń quqyqtarynyń saqtalýyna erekshe toqtaldy.
«Organda qyzmet etetin azamattar da – óz baýyrlarymyz. Olar elmen birge ekenin, týǵan halqy úshin qasyq qany qalǵansha kúresetinin dáleldedi. Otan aldyndaǵy antyna adal bolyp, memleketimizdi janqııarlyqpen qorǵady. Men syn saǵatta qaterge qaımyqpaı qarsy turǵan tártip saqshylaryna rızashylyq bildiremin» dedi Prezıdent.
Aıtyp ótý kerek, Ulttyq ulan jaýyngerleri «qasiretti qańtar» oqıǵasy kezinde elimizdiń konstıtýtsııalyq qurylymyn, turaqtylyǵy men tynyshtyǵyn qorǵady, azamattardyń zańdy quqyqtaryn qamtamasyz etýge atsalysty. Barshaǵa aıan, Almaty, Shymkent qalalarynda jáne oblys ortalyqtarynda quqyqtyq tártipti qamtamasyz etýde buzaqy toppen qarsylasýdyń nátıjesinde jaraqat alǵan Ulttyq ulan áskerı qyzmetshileriniń sany 400-ge jetti. Budan bólek, jappaı tártipsizdik kezinde Ulttyq ulannyń 90-nan asa áskerı tehnıkasy zardap shekti. Soǵan qaramastan, el basshylyǵy da, quqyqtyq tártip áskeri de úlken «kúshke» qarsy turdy.
«Sońǵy jyldary biz Qazaqstandy túbegeıli jańǵyrtýǵa, transformatsııalaýǵa kóshtik. Túrli salada aýqymdy ózgerister bastaldy. Bul keıbir yqpaldy adamdarǵa unamady. Olar jyldar boıǵy zańsyz áreketterin odan ári jalǵastyra berýdi kózdedi. Neǵurlym joǵary bılikke ıe bolýdy kóksedi. Sol úshin kánigi qylmyskerler, qarýly zańsyz uıymdar men opasyz sheneýnikter birigip, astyrtyn top qurdy», - dedi Memleket basshysy. Prezıdenttiń tóńkeris uıymdastyrýshylardy osylaı sıpattaýynan quzyrly organdar men ásker qandaı alpaýyt qaýip-qatermen betpe-bet kelgenin túsinýge bolady.
Sondaı-aq, «Іshki jáne syrtqy jaýlarymyz ózara ymyralasyp, bılikti basyp alǵysy keldi. Olar halyqtyń narazylyq sherýin basqa arnaǵa buryp, jurtty qasaqana arandatty. Lańkester memlekettik organdarǵa, strategııalyq nysandar men bızneske tıesili ǵımarattarǵa shabýyl jasady. Bılikke kúıe jaǵý úshin beıbit turǵyndarǵa oq atty», - dedi el Prezıdenti.
Á.Serálıevtiń sózine qaraǵanda, ulandyq jaýyngerler ózderiniń mindetterine, bergen áskerı anttaryna adal boldy. «Buıryqtyń aty – buıryq» dep búlikshilerge jol bermegen ofıtser Ulan Myrzabaev ta, jas ómirlerin beıbit ómir jolynda qıǵan qatardaǵy jaýyngerler Madııar Qaısarov pen Aıbat Amanov ta óz erlikterimen «Ár túrli kózqaras – birtutas ult» qaǵıdatyn berik ustanýǵa tıis bolashaq jańa Qazaqstannyń irgetasyn qalady.
«Biz ótkennen sabaq alyp, búkil el bolyp, táýelsizdiktiń qadir-qasıetin jan-júregimizben sezinýge, tatýlyq pen turaqtylyq, tynyshtyq pen beıbitshilik qanshalyqty mańyzdy ekenin jete túsinýge tıispiz. Qazaqstan Prezıdenti aıtqandaı: «Qazir saıası barrıkadalar ornatyp, ár máselege bola mıtıng ótkizetin, kúmándi sheshimderge ıtermelep, jónsiz talap qoıatyn, mindetin oryndap júrgen polıtsııa qyzmetkerleriniń jaǵasyna jarmasatyn ýaqyt emes». Qazir táýelsizdigimiz ben konstıtýtsııalyq qurylymymyzdy nyǵaıtatyn ýaqyt. Qarýly Kúshterimizdiń Joǵarǵy Bas qolbasshysy Qasym-Jomart Kemeluly Toqaev elordalyq jedel brıgadaǵa barǵan alǵash saparynda Ulttyq ulanǵa «Naǵyz erlik pen patrıotızm mektebi» degen baǵa bergen bolatyn. Osy oraıda Ulttyq ulan áskeri máńgi saqshy ispetti ózine júktelgen mindetterge saı quqyqtyq tártipti ári qaraı da qamtamasyz ete beretinine sendirgim keledi», dep túıindedi oıyn Á.Serálıev.
