Qazir Syrdarııadaǵy máseleni rettemesek, erteń kesh bolady - Murat Baqtııaruly

NUR-SULTAN. QazAqparat - Aral-Syrdarııa basseıniniń memleketteri tarapynan Syrdarııa ózeniniń tómengi aǵysyna sý jiberý boıynsha qabyldaǵan halyqaralyq sharttar men mindettemeler oryndalmaıdy. Bul máseleni tez arada sheshý úshin Premer-Mınıstr Álıhan Smaılovtyń atyna joldaǵan saýalynda senator Murat Baqtııaruly tıisti usynystardy aıtty, dep habarlaıdy QazAqparat tilshisi.

Depýtattyń aqparaty boıynsha, Syrdarııa ózeni basseıniniń kepildi sýmen qamtamasyz etilýiniń buzylýyna baılanysty sońǵy jyldary Qyzylorda oblysynda sý tapshylyǵynyń óte kúrdeli problemasy qalyptasty. Ótken jyly Shardara sý qoımasyna kelisilgen sý kóleminiń 57% - y ǵana kelip tústi. Bıyl jaǵdaı odan da kúrdeli bolatyny qazir túsinikti.

«Mysaly, qazirgi kezde Kishi Araldyń sý kólemi 2015 jylǵa qaraǵanda bes mılllıard kýbqa azaıyp, jaǵalaýdan 20 metrge deıin tartylyp ketti. Oblys kólemindegi 200-den astam kóldiń 14–i tolyǵymen tartylyp, qalǵandarynyń sýy 50 paıyzǵa deıin azaıdy», - dep atap ótti depýtat.

Murat Baqtııaruly oblys halqynyń negizgi bóligi Syrdarııa ózeninde turatynyn jáne olardyń tabystary ózen ekojúıesimen tikeleı baılanysty ekenin atap ótti. Osyǵan baılanysty, oblys turǵyndary qalyptasqan jaǵdaıdyń nasharlaýyna qatty alańdaıdy, sondyqtan senator memleketaralyq deńgeıde sý jetkizý máselesin jedel sheshýdi óte mańyzdy dep sanaıdy.

«Úkimet basshysy retinde sý saıasatyn myqtap qolǵa almasańyz, erteń kesh bolady. Tıisti mınıstrlik deńgeıinde bul másele sheshilmeıdi. Ol úshin transshekaralyq sý máselelerinde Qazaqstannyń múddesin bermeýimiz kerek. Sondyqtan sý saǵasynda ornalasqan elderden sýdyń memleketaralyq kelisimge sáıkes mólsherin memlekettik deńgeıde sheshýdiń joldaryn tez arada qarastyrý qajet. Ortaq sý paıdalaný máselesin tıimdi sheshý úshin ol elderge qatysty ekonomıkalyq tetikterdi de paıdalanǵan durys dep esepteımiz», - dedi senator.

Sondaı-aq, Murat Baqtııaruly óńirdegi paıdaly qazbalardy óndirý deńgeıin tómendetýge, gazben qamtamasyz etýge jáne basqa da máselege baılanysty negizgi problemalardy atap ótti.