Qazir sport degenińiz shoýǵa aınalyp barady - Arystanbek Muhamedıuly
ASTANA. QazAqparat - Qazaqstan men Qyrǵyzstan kókparshylarynyń serkeni qazandyqqa nemese sheńberge salýǵa qatysty oıy ekige jarylǵan bolatyn. Bul suraq Arystanbek Muhamedıuly men Muhtarhan Dildábekovtyń búgingi kezdesýinde de kóterildi, dep habarlaıdy QazAqparat tilshisi.
«Kókpardyń qazandyǵy týraly aıtyp jatyrmyz ǵoı. Qazandyqqa salý nemese salmaý týraly kókpar oınaıtyn ár memlekettiń óz erejesi bar. Kókpar ǵana emes, ár sporttyń ózindik qateri bar ekenin eskerý kerek. Shańǵy bolsyn, bıikke sekirý bolsyn - ár sportta qaýip az emes. Sondyqtan, meniń oıymsha, eger qazandyqqa salý týraly sheshim shyǵyp jatsa, ony tragedııa qylýdyń qajeti joq», - dedi Arystanbek Muhamedıuly «Kókpar» federatsııasynyń prezıdenti Muhtarhan Dildábekovpen kezdesý barysynda.
Mınıstrdiń aıtýyna qaraǵanda, bir kezderi jabyq ótetin MMA saıystary qazir úlken chempıonattarǵa ulasyp ketken.
«Bylaı qarasańyz, Tokıodan keıin MMA Olımpıada sport túrleriniń qataryna da kirýi múmkin. Qazir sport shoý bolyp bara jatyr. Buryn teledıdarda mýzykalyq arnalar kóp edi, qazir kóbisi sportqa qyzyǵady. Búgingi tańda sporttyń barlyq túrlerin halyqqa qyzyqty etý úshin kúrdeli dúnıeler jasap jatyr. Sondyqtan, halyqaralyq qaýymdastyqpen kelisip, alǵa jyljý kerek», - dedi mınıstr.
Eske sala ketsek, búgin QR Mádenıet jáne sport mınıstri Arystanbek Muhamedıuly «Kókpar» federatsııasynyń prezıdenti Muhtarhan Dildábekovty qabyldap, kezdesý barysynda kókpardyń keleshegi, aldaǵy jarystarǵa daıyndyq máselesin talqylaǵan bolatyn.
