Qazir saqtandyrýshy kompanııalardyń úsheýi - májbúrli, al bireýi erikti túrde taratylýda
ALMATY. 22 qarasha. QazAqparat /Erlik Erjanuly/ - «Saqtandyrý tólemderine kepildik berý qory" AQ 2009 jylǵy qyrkúıekten beri májbúrlep taratylǵan 3 saqtandyrý kompanııasynyń kredıtorlaryna 825,2 mıllıon teńge shamasynda kepildik jáne ótemaqy tólemderin tóledi.
Bul týraly búgin Almatyda ótken baspasóz máslıhatynda aıtyldy.
«Saqtandyrý tólemderine kepildik berý qory týraly» QR Zańy talaptaryna sáıkes 20 qarashada «Premier Saqtandyrý» AQ-nyń kredıtorlarynan kepildik tólemderin júzege asyrý jónindegi ótinishterin qabyldaý aıaqtaldy. Qor májbúrlep taratylǵan «Altyn-Polıs» SK» kredıtorlaryna 672 mıllıon teńge, «Premier Saqtandyrý» AQ-nyń kredıtorlaryna 145,1 mıllıon teńge, «NASKO-Qazaqstan» Halyq saqtandyrý kompanııasy" AQ-nyń kredıtorlaryna 8,2 mıllıon teńge ótemaqy tólemderin tóledi», - deıdi «Saqtandyrý tólemderine kepildik berý qory» AQ-nyń Bas dırektory Gúlbaný Musaeva.
QR Qarjy naryǵy men qarjy uıymdaryn retteý jáne qadaǵalaý agenttiginiń Qarjylyq uıymdardy taratý departamentiniń dırektory Zaýra Jumabaevanyń sózine qaraǵanda, qazirgi kezde 3 saqtandyrý kompanııasy - májbúrli, al bireýi erikti túrde taratý úderisin bastan ótkizip jatyr. Májbúrlep taratý «Altyn-polıs» saqtandyrý kompanııasynda 2009 jyldyń qyrkúıeginde, «NASKO-Qazaqtan» halyq saqtandyrý kompanııasynda - 2010 jyldyń naýryz, «Premier saqtandyrý» kompanııasynda mamyr aıynda bastaldy. Al «Temir at» saqtandyrý kompanııasynda maýsym aıynda agenttikten erikti túrde taratýǵa ruqsat aldy. Jaqyn arada endi bul kompanııa da óz qyzmetin toqtatatyn bolady.
