Qazir otyn qoımalarynda 4,1 mln. tonna kómir men 120 myń tonna mazýt jınaldy - QR Energetıka mınıstrligi
ASTANA. QazAqparat - Búgin QR Premer-Mınıstriniń birinshi orynbasary Baqytjan Saǵyntaev ekonomıkalyq ósimdi qamtamasyz etý men jylytý maýsymyn ótkizý máseleleri boıynsha selektorlyq jıyn ótkizdi, dep habarlanǵan QR Premer-Mınıstriniń saıtynda.
«Ekonomıkalyq ósimdi qamtamasyz etý boıynsha 2014 jyldyń sońyna deıin qolǵa alynatyn sharalar josparymen munaı-gaz, aýyl sharýashylyǵy, taý-ken jáne óńdeýshi ónerkásip salalarynda óndiris kólemin ulǵaıtýǵa baǵyttalǵan sharalar, sonymen birge ShOB qoldaý, halyqty jumyspen qamtý jáne jumyssyzdyq deńgeıiniń ósýin boldyrmaý sharalary qamtyldy», - delingen habarlamada. Energetıka mınıstrliginiń málimetteri boıynsha, respýblıkanyń energııa júıesi shtattyq rejımde jumys isteıdi. Tutynýshylardyń elektrdi turaqty túrde tutynatyny baıqalyp otyr. 76,5 mlrd. kVTch elektr energııasy óndirildi, bul ótken jyldyń uqsas kezeńimen salystyrǵanda 1,5 paıyzǵa kóbirek. Qarasha aıynyń basyna otyn qoımalarynda 4,1 mln. tonna kómir men 120 myń tonna mazýt jınalǵan. Sonymen birge kún tártibindegi suraqtar boıynsha oblys ákimderiniń orynbasarlarynyń baıandamalary tyńdaldy. Jıyn qorytyndysy boıynsha Baqytjan Saǵyntaev memlekettik organdar men oblystyq ákimdikterdiń basshylaryna ekonomıkalyq ósimdi qamtamasyz etý, sondaı-aq jóndeý jumystaryn merziminde aıaqtaý jáne jylytý maýsymy úzilissiz júrýi úshin energokásiporyndy otynmen qamtamasyz etý boıynsha sharalar Josparynyń barlyq pýnktterin ýaqytyly oryndaýǵa qatysty qajetti sharalardy qolǵa alýdy tapsyrdy.
