Qazir ómir súrip jatqan 10 mıllıon brıtandyq júz jyldyǵyn atap ótedi
ASTANA. 30 jeltoqsan. QazAqparat - Kútilip otyrǵandaı, qazir ómir súrip jatqan 10 mıllıon brıtandyq kem degende 100 jasqa deıin ómir súredi. Osyndaı boljamdy Ulybrıtanııanyń Eńbek jáne zeınetaqy departamenti (Department for Work and Pensions) sársenbi kúni, 29 jeltoqsanda jasady, dep habarlaıdy Agence France-Presse.
Departamenttiń baǵalaýynsha, qazirdiń ózinde Ulybrıtanııa aýmaǵynda turyp jatqan 10 mıllıonnan astam brıtandyq 100 jasqa deıin ómir súredi. Eger 2010 jyly Ulybrıtanııada óziniń 100-inshi týǵan kúnin atap ótken nebári 11,8 myń adam bolsa, 2066 jyly boljam boıynsha mundaı uzaq jasaıtyndar sany kem degende 507 myń adamdy quraıdy.
Jasy 16-ǵa tolmaǵan brıtandyqtar arasynda uzaq jasaıtyndar sany shamamen úsh mıllıonǵa deıin jetýi múmkin, dep naqtylaıdy The Daily Telegraph . Al 2010 jyly jasy 16-dan 50-ge deıin bolǵandar arasynda júzjyldyq mereıtoıyn 5,5 mıllıon adam atap ótýi múmkin.
Kútilip otyrǵan ómir jasynyń uzaqtyǵyn arttyrý týraly málimetterdi jarııa etý arqyly Eńbek jáne zeınetaqy departamenti úkimet júrgizip jatqan zeınetaqy reformasynyń qajettiligi týraly eske salýda. «Mıllıondaǵan brıtandyq aldaǵy kúnderi zeınetkerlikte óziniń ómiriniń úshten birin ótkizetin bolady, - dep málimdedi departament basshysy Stıv Ýebb. - Biz júrgizip jatqan reformanyń maqsaty - adamdardy laıyqty bazalyq memlekettik zeınetaqymen qamtamasyz etý, sonymen qatar olarǵa jeke zeınetaqy kapıtalyn qurýǵa kómektesý».
Eske sala ketsek, Ulybrıtanııa úkimeti birneshe jyl qatarynan elde zeınetaqy júıesi reformasyn ótkizýge talpynys jasaýda. El turǵyndary arasynda úkimettiń zeınetkerlikke shyǵý merzimin uzartýdy qarastyratyn reformasy qoldaý tappaı otyr.
