Qazir memleketti soǵyspen emes, ishine iritki salý arqyly jaýlaıdy - N.Erimbetov

ASTANA. QazAqparat - Qazir memleketti soǵys arqyly emes, el ishine iritki salý arqyly jaýlaıdy. Bul týraly búgin «Astana - Qazaqstan halqynyń ulttyq birligin nyǵaıtýdaǵy negizgi faktory» atty ǵylymı-tájirıbelik konferentsııada Qazaqstannyń Azamattyq alıansy birlestiginiń basshysy Nurlan Erimbetov málim etti.

Onyń aıtýynsha, Qazaqstandaǵy ultaralyq, dinaralyq kelisimdi saqtaýdyń mańyzdylyǵy artpasa, eshqashan kemigen emes.

«Qazaqstan Prezıdenti Nursultan Nazarbaev «Nur Otan» partııasynyń Sezinde memleketti adamdar qoldaýy kerek, etnostardyń myqty kelisimi men ózara teńdigi bolýy qajet dep aıtqan bolatyn. Sebebi, qazir memleketti soǵys arqyly emes, ishten iritki salý arqyly jaýlaıdy. Eýropada, Amerıkada, Azııada ne bolyp jatyr?! Adamdar alańǵa shyǵyp, birin biri óltirip jatyr. Bul munaı baǵasynyń quldyraýynan nemese ekonomıkalyq sebepterden emes, áleýmettik jáne ulttyq toptardyń arasyna jik salýdan bastalady. Búgin soǵan qarsy turýymyz shart», - dedi ol.

Onyń atap kórsetkenindeı, shet memleketterden kelgen meımandar elimizdegi bul tynyshtyqty basty baılyq retinde baǵalaıdy. Sondyqtan Qazaqstan jurty bul birlikti óziniń negizgi qýaty retinde saqtap qalýy tıis dep otyr.

«Men QR Prezıdenti saılaýynda baqylaý respýblıkalyq qoǵamdyq komıssııasynyń basshysy boldym. Kóptegen shetel baıqaýshylarymen kezdestim. Olar Qazaqstandaǵy ultaralyq tynyshtyqqa, kelisimge tánti boldy. Kóshede túrli ult ókilderin kórip, olardyń bir-birimen tatý-tátti ekenin, kóshede esh qorqynyshsyz serýendeýge bolatynyn baıqady. Astana olar úshin jańalyq boldy. Qazaqstanǵa at basyn tiregende olar tipti bul memleket qaıda ekenin de bilmegen bolatyn. Olar maǵan azyq-túlik nemese kıim baǵalaryn aıtqan joq, kóshede túngi ýaqytqa deıin serýendegendegi áserlerimen bólisti. Jastardyń, túrli ult pen ulystardyń bir-birine baýyrdaı qaraǵanyn, halyqtyń ishindegi qapersiz, tynysh ómirdi aıtýmen boldy», - deıdi N.Erimbetov.