Qazir qoldanylatyn hımıoterapııa naýqastyń ómirin 3-5 jylǵa uzartady – mınıstrlik
ASTANA. QazAqparat – Jyl basynan beri qaterli isik dıagnozy qoıylǵan 14 myńnan astam qazaqstandyq hımıoterapııa aldy. Bul týraly Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Azamat Dúısenov málim etti, dep habarlaıdy QazAqparat tilshisi.
«Bıylǵy 7 aıdyń qorytyndysy boıynsha Qazaqstanda 14 175 patsıent hımıoterapııalyq em alyp jatyr. Hımıoterapııa onkologııalyq aýrýlardy emdeýdiń negizgi ádisterine jatady. Ol bekitilgen dıagnostıka jáne emdeý hattamalaryna sáıkes taǵaıyndalady. Negizinen keshendi emdeý quramynda – isik mólsherin jáne metastazdardy (klınıkalyq, klınıkaǵa deıingi) azaıtý maqsatynda hırýrgııalyq emdeýge deıin, remıssııaǵa qol jetkizý maqsatynda jáne qaıtalanýdyń aldyn alý maqsatynda júrgizedi», - delingen departament dırektorynyń tilshi saýalyna oraı joldaǵan jaýabynda.
Vedomstvo deregine saı, zamanaýı ımmýnoterapııany qoldaný asqyný satysyndaǵy onkologııalyq naýqastardyń densaýlyǵyn jaqsartýǵa sep boldy.
«Zamanaýı maqsatty jáne ımmýnoterapııany qoldaný metastazben damyǵan qaterli isiktiń kezeńderi bar naýqastardyń nátıjeleriniń jaqsarǵanyn kórsetedi. Eger buryn ókpeniń qaterli isigi, melanoma, sarkoma sııaqty joǵary agressıvti lokalızatsııalarda biz 1 jyldyq ómir súrý týraly aıtatyn bolsaq, qazir zamanaýnı tıimdi dárilik jáne radıoterapııa ádisterin qoldana otyryp, biz 3 jáne 5 jyldyq ómir súrý uzaqtyǵy jaıly aıta alamyz», - dep jazylǵan vedomstvo usynǵan jaýapta.
Qosa ketsek, Qazaqstanda onkologııamen aýyratyn 210 myńnan astam adam esepte tur.
Keıingi 2 jylda jastardan qaterli isik jıi anyqtalyp jatyr.
Jalpy jyl saıyn onokologııaǵa shaldyqqan naýqastardy emdeýge 36 mlrd teńge bólinedi.
